Հուլիսի 13-ին Եվրագոտու գագաթնաժողովի մասնակիցները արդեն պատրաստ էին համաձայնելու Հունաստանի՝ Եվրամիությունից դուրս գալուն: Ըստ Financial Times-ի լրագրողներ՝ դրան խանգարել է Եվրախորհրդի նախագահ Դոնալդ Տուսկը:
Բրյուսելի ժամանակով առավոտյան ժամը 6-ին, երբ Հունաստանի վարչապետ Ցիպրասի և Գերմանիայի կանցլեր Մերկելի բանակցությունները մտել են փակուղի, և նրանք այն շարունակելու իմաստ չեն տեսել, Հունաստանը շատ մոտ է եղել Եվրամիությունից դուրս գալուն: Նրանք ուզեցել են հեռանալ դահլիճից, սակայն նրանց կանգնեցրել է Տուսկը:
Տուսկին միացել է նաև Ֆրանսիայի նախագահ Ֆրանսուա Օլանդը, ով Մերկելին և Ցիպրասին համոզել է համաձայության գալ: Համաձայնության չգալու պատճառը եղել է այն, որ Մերկելը ցանկացել է, որ սեփականաշնորհումից ստացված 50 միլիարդ եվրո եկամուտը ուղղվի Հունաստանի պարտքերի մարմանը: Դա Ցիպրասը համարել է ազգի համար նվաստացում և առաջարկել է ավելի քիչ չափերի ֆոնդ ստեղծել:
Փոխզիջման հասնելու համար Մերկելից և Ցիպրասից ևս մեկ ժամ է պահանջվել, որի ժամանակ քննարկվել են տասնյակ տարբերակներ:
Պարբերականը նշում է, որ բանակցություններում զգացվել է Ֆրանսիայի և Գերմանիայի միջև լարվածություն: Մասնավորապես Ֆրանսիայի նախագահը աջակցել է Ցիպրասին և հանդես եկել Հունաստանի նվաստացման դեմ:
Գագաթնաժողովի արդյունքում Հունաստանը նշանակալի զիջումների է գնացել վարկատուների նկատմամբ, ինչի փոխարեն նրան կտրամադրվի եռամյա օգնության ծրագիր՝ 82-86 միլիարդ եվրոյի չափով:
Հունաստանի խորհրդարանը մինչև հուլիսի 15-ը պարտավոր է ընդունել թոշակային բարեփոխումների և հարկերի բարձրացման վերաբերյալ օրենքներ, որից հետո Եվրախումբը կանցնի ծրագրի մանրամասն դիտարկմանը, որին էլ դեռ պետք է հավանություն տա Եվրագոտու երկրների օրենսդրական ժողովը:
