Էլեկտրաէներգիայի թանկացման դեմ պայքարող «Ոչ թալանին» քաղաքացիական նախաձեռնությունը հուլիսի 14-ին` ժամը 18:00-ին, արտոնված երթով շարժվելու է դեպի գլխավոր դատախազություն: «Առաջին լրատվական»-ի հետ զրույցում նախաձեռնության անդամ Մաքսիմ Սարգսյանը ասաց, որ երթը իրականացնելու են իրենց երրորդ պահանջի կատարման համար:
«Պահանջում ենք պատժել այն ոստիկաններին, որոնք հունիսի 23-ին և դրան հաջորդած դեպքերի ժամանակ բռնի ուժ են կիրառել էլեկտրաէներգիայի սակագնի թանկացման դեմ պայքարող քաղաքացիների նկատմամբ. պահանջելու ենք քրեական գործ հարուցել»,- նշեց նա:
Ըստ նրա՝ այս ճանապարհով հասարակությունը ցույց է տալիս, որ չի հանդուրժելու ոչ իրավաչափ գործողությունները և պահանջատեր է լինելու միչև իրենց սահմանած խնդիրները լուծում չստանան: Մաքսիմ Սարգսյանն ասաց, որ շարունակելու են պայքարը իրենց առաջ քաշած պահանջների մասով:
«Առաջին լրատվական»-ը «Դուրս մեր գրպանից» քաղաքացիական նախաձեռնության անդամ Վարդան Հակոբյանից հետաքրքրվեց՝ արդյոք միանալո՞ւ են երթին, քանի որ մինչև Բաղրամյանի հունիսի 28-ի դեպքերը հայտարարվել էր, որ «Դուրս մեր գրպանից»-ը աջակցելու է «Ոչ թալանին» նախաձեռնության պայքարին, նաև միասին էին իրականացրել հունիսի 19-ի հանրահավաքի մասին իրազեկող ավտոերթը: Վարդան Հակոբյանն ընդգծեց՝ չի կարծում, որ նախաձեռնության անդամները կմիանան վաղվա երթին: «Նման որոշում չի ընդունվել»,- մանրամասնեց նա:
Անդրադառնալով հարցին, թե ավելի վաղ հայտարարել էին, որ աջակցելու են «Ոչ թալանին» քաղաքացիական նախաձեռնության պայքարին, «Դուրս մեր գրպանից»-ի ներկայացուցիչն ասաց. «Հայտարարվել էր, բայց հիմա տեսնում եք՝ մի քանի պայքարող խումբ կա: Հայտարարել էինք, որովհետև գնում էինք ժողովրդի ցանկություններին ընդառաջ: Հիմա սեփական նախաձեռնություններ են անում, թող անեն»:
