ԵԽԽՎ մոնիտորինգի հանձնաժողովը Հայաստանի իշխանություններին կոչ է արել 2008 թ. մարտի 1-ի դեպքերի հետ կապված բոլոր անձանց պարտադիր ազատ արձակել: Այս առնչությամբ այսօր իր գնահատականները ներկայացրեց ԵԽԽՎ հայաստանյան պատվիրակության անդամ, ԱԺ «Ժառանգություն» խմբակցության պատգամավոր Զարուհի Փոստանջյանը:
Նա նշեց, որ Նիկոլ Փաշինյանի մասով ասվում է, թե նրա պայմանական վաղաժամկետ ազատարձակման ժամկետը լրանում է ամռանը, և այդ ժամկետը լրանալուց հետո նրան պարտադիր պետք է ազատ արձակեն. «Սասուն Միքայելյանի վերաբերյալ ասվում է, որ պետք է ցուցաբերվի հումանիստական մոտեցում, և առողջական խնդիրների պատճառով նրան էլ պետք է պարտադիր ազատ արձակեն: Նաև անդրադարձ կա մարտի 1-ի տասը զոհերին, և ասվում է, որ պետք է կատարվեն պատշաճ քննություն և բացահայտումներ»:
Փոստանջյանը նկատեց, որ երեք տարիներին պատկան մարմինների կողմից մարտի 1-ի տասը սպանությունների դեպքերի բացահայտման ուղղությամբ որևէ պատշաճ փորձ չի արվել. «Եթե նման բան լիներ, ապա բոլոր մեղավորներն այսօր հայտնի կլինեին հանրությանը: Փաստահավաք խումբը շատ մեծ աշխատանք էր տարել, և դրանից կարելի է պարզ պատկերացում կազմել, թե ինչ է տեղի ունեցել մարտի 1-ին: Այսօր ՀՀ գլխավոր դատախազ Աղվան Հովսեփյանը, դրսևորելով անգործություն, հանցակից է այդ հանցագործությունները չբացահայտելու համար, և այսօր ՀՀ իրավապահ մարմիները ևս հանցակից են այդ անգործությանը»:
Փոստանջյանը նկատեց, որ քաղաքական կամքի դրսևորման կոչը նշանակում է, որ պետք է կատարվի քննություն, և մեղավորները պատժվեն. «Բոլորը գիտեն, որ ՀՀ զինված ուժերը ներգրավված են եղել մարտի 1-ի դեպքերում, զոհերից մեկը ժամկետային զինծառայող է եղել։ Ի՞նչ գործ ուներ ժամկետային զինծառայողը Երևանի կենտրոնական փողոցներում, այնտեղ ի՞նչ ծառայություն էր մատուցում. որևէ մեկը այդ հարցին մինչ օրս չի պատասխանել: Հարցերն առկա են, բայց դրանց պատասխանելու ցանկություն չկա»:
