Թուրքական Radikal թերթի փոխանցմամբ, այսօր առաջին անգամ Բաքըրքյոյի 2-րդ դատարան է կանչվել «Էրգենեկոն» ահաբեկչական կազմակերպության գործի շրջանակներում ձերբակալված, թուրք հետաքննող լրագրող Նեդիմ Շեները:
Նա մեղադրվում է հետաքննության խիստ գաղտնի կարգը չպահպանելու մեջ: Նշվում է, որ դա գրանցվել է 2010 թվականի սեպտեմբերի 30-ին, երբ Շեները մի շարք գաղտնիքներ պարունակող հոդված է հրապարակել թուրքական Milliyet թերթում (ինչի մասին, չգիտես ինչու, հիշեցին միայն հիմա):
Այժմ, Թուրքիայի քրեական օրենսգրքի 285-րդ հոդվածի 1-ին և 3-րդ կետերով, Շեներին սպառնում է 1.5-4.5 տարվա ազատազրկում:
Հիշեցնենք, որ Նեդիմ Շեները Ստամբուլի հայկական «Ագօս» թերթի նախկին խմբագրապետ Հրանտ Դինքի սպանության մասին հեղինակել է «Հրանտ Դինքի սպանությունն ու հետախուզության ստերը» և «Կարմիր ուրբաթ. ո՞վ կոտրեց Դինքի գրիչը» գրքերը, որոնցում Դինքի սպանությանն առնչվող բազմաթիվ մութ էջեր է վեր հանել:
Ի դեպ, երկրորդ գիրքը թուրքական շուկայում հայտնվել էր այս տարվա հունվարին: Դրանից երկու ամիս անց Շեները ձերբակալվեց:
