Երեք տարի առաջ «Ամերիկյան կուռք»-ի տեղական անալոգ շուի մասնակից, իսրայելցի Ադի Լեդերմանը մի քանի երաժիշտների, այդ թվում՝ Մադոննայի, համակարգիչները ջարդելու համար դատապարտվել է 14 ամսվա բանտարկության և 15 հազար շեքել տուգանքի: Այդ մասին հայտնում է NBC-ն:
39-ամյա Լեդերմանը իրեն մեղավոր է ճանաչել անձնական կյանք ներխուժելու և հեղինակային իրավունքների խախտման համար: Առողջական խնդիրների պատճառով նրա նկատմամբ կիրառել են մեղմացված տույժ:
Գործի հետաքննության արդյունքում Լեդերմանը 2015 թվականի հունվարին ձերբակալվել է: Ոստիկանությունը հայտարարել է, որ ձերբակալվածը կասկածվում է գողացված երգերի վաճառքի մեջ:
Նշենք, որ 2014 թվականի դեկտեմբերին համացանցում հայտնվեցին Մադոննայի նոր Rebel Heart ալբոմի անավարտ երգերը: Երգչուհին դա անվանեց ներխուժում իր անձնական և ստեղծագործական կյանք և հայտարարեց, որ դա իր համար ծայրահեղ տհաճ է և ցավագին:
Լեդերմանը հայտնվել էր «Ամերիկյան կուռք»-ի իսրայելյան անալոգ «Աստղի ծնունդը» հեռուստածրագրի եթերում 2012 թվականին: Սակայն, նա նույնիսկ առաջին փուլը չէր անցել և թողել էր նախագիծը:
