Անբավարար կամ ոչ որակյալ ուսումը, պարզվում է, մարդու կյանքի համար նույնքան վտանգավոր գործոն է, ինչպես ծխելը: Վիճակագրությունը ցույց է տալիս, որ ավարտական քննությունների վատ արդյունքները կարող են մարդու կյանքը կրճատել 10 տարով, հայտնում են գիտնականները PLoS One ամսագրում հրապարակված հոդվածում:
«Մեր ստացած արդյունքները ցույց են տալիս, որ կրթության հասանելիության բերալավմանն ուղղված բարեփոխումները և այլ փոփոխությունները կարող են զգալիորեն մեծացնել ԱՄՆ բնակիչների կյանքի տևողությունը, հատկապես հաշվի առնելով հասարակության ամենակրթված և չկրթված շերտերի աճող տարբերությունը: Եթե ընթացիկ միտումները չփոխվեն, ցածր կրթածությամբ մարդկանց շրջանում մահացությունը կշարունակի աճել»,- ասել է Պատրիկ Քրյուգերը Դենվերում Կոլորադոյի համալսարանից:
Քրյուգերը և նրա գործընկերներն այսպիսի եզրակացության են եկել՝ համադրելով դպրոցականների առաջադիմության, նրանց կրթության որակի և կյանքի հետագա տարիների վիճակագրությունը 1925 թվականից մինչ օրս:
Այդ համեմատությունը ցույց է տվել, որ կրթության որակն ու տևողությունը ուղղակիորեն կապված են ամերիկացիների կյանքի տևողության հետ:
Ամանաանհանգստացնողն այն է, որ բնակչության ամենակրթված և անկիրթ շերտերի միջև անդունդը իր հետևից «քաշել է» մահացությունը: Դա արտահայտվում է նրանով, որ կրթված և անկիրթ ամերիկացիների կյանքի միջին տևողության տարբերությունը գնալով ավելի արագ է աճում:
