Սերժ Սարգսյանն ու Հովիկ Աբրահամյանն այսօր միաժամանակ լինելու են Ռուսաստանում, սակայն տարբեր քաղաքներում: Եթե Սերժ Սարգսյանն Ուֆայում մասնակցելու է ԵՏՄ-ի, ՇՕՍ-ի և ԲՐԻԿՍ-ի գագաթնաժողովներին, ապա Հովիկ Աբրահամյանը Մոսկվայում հանդիպելու է ՌԴ վարչապետ Մեդվեդևի հետ:
Այս երկու իրադարձությունները ընդհանուր առմամբ պետք է նպատակ հետապնդեն պահել Հայաստանի տնտեսության շնչառությունն ու վերականգնել առողջությունը, ինչը այսօր, մեղմ ասած, բավական խաթարված վիճակում է: Սակայն Սերժ Սարգսյանի և Հովիկ Աբրահամյանի ռուսաստանյան այցերը, ըստ էության, ունեն նաև այլ՝ այսպես ասած, քաղաքական կամ ներքաղաքական, իսկ ավելի շուտ՝ ներիշխանական երանգ, որն իհարկե հրապարակված կամ հայտարարված չէ, սակայն անխուսափելի է Հայաստանում ստեղծված իրավիճակի ֆոնին: Հատկապես էլեկտրաէներգիայի թանկացման խնդրի շուրջ հայաստանյան իրադարձություններն ու ՀԷՑ-ի ճակատագրի հարցը այստեղ բավական շոշափելիորեն ի ցույց են դնում այս խնդիրները:
Մամուլում հրապարակումներ եղան, որ Սերժ Սարգսյանը հունիսի 27-ին մտադիր է եղել հայտարարել ՀԷՑ-ի սեփականատիրոջ փոփոխության անհրաժեշտության մասին, սակայն ինչ-ինչ գործոններից ելնելով՝ այդ մտադրությունից հրաժարվել է: Սերժ Սարգսյանը հակված է այդ փոփոխությանը, և ակնհայտ է, որ հենց Սարգսյանն է ռուսաստանցի միլիարդատեր Սամվել Կարապետյանի կողմից ՀԷՑ-երի գնման, այսպես ասած, գաղափարախոսը, և սա նաև սարգսյանական ոճի մեջ է: Նույն ոճով նա 2006 թվականին առաջ մղեց Հրազդան ՊՇԷԿ-ի հինգերորդ բլոկը Ռուսաստանին վաճառելու և այդպիսով գազի գնի թանկացումը սուբսիդավորելու գործարքը:
Իր հերթին, ՀԷՑ-ի հարցում այս գործարքին դեմ է Հովիկ Աբրահամյանը, քանի որ նմանօրինակ խոշոր օբյեկտի ձեռքբերումով և հսկայական ներդրումներով Սամվել Կարապետյանը անկասկած ավելացնում է իր կշիռը և՛ քաղաքական կյանքում, և՛ իշխանության համակարգում ընդհանրապես: Իսկ այստեղ արդեն Հովիկ Աբրահամյանի հետ տեղի է ունենում շահերի բախում, քանի որ առաջնային հավակնություններ ունի նաև Աբրահամյանը: Ավելին՝ Սերժ Սարգսյանն այս գործարքով ըստ էության մտադիր է երևի թե նաև Կարապետյանին դարձնել հակակշիռ Հովիկ Աբրահամյանին: Վերջինս էլ շահագրգռված է ՀԷՑ-ի խնդրի լուծմամբ, բնականաբար, սակայն ոչ Կարապետյանի միջոցով, նրա դերակատարման աճով:
Ռուսաստանում Սերժ Սարգսյանն ու Հովիկ Աբրահամյանն այսօր կփորձեն առաջ մղել խնդրի հանգուցալուծման իրենց տարբերակներն ու պատկերացումները, որոնք էլ, ինչպես արդեն նշեցինք, տրամագծորեն տարբեր են: Իսկ հարցը կարևոր է, քանի որ ըստ էության վերաբերում է Հայաստանի տնտեսության ողնաշարին: Ավելի շուտ ոչ թե Հայաստանի, այլ Հայաստանի իշխանական համակարգի տնտեսական ողնաշարի, քանի որ ակնհայտ է ՀԷՑ-ի այսպես ասած յուրօրինակ հարաբերությունները իշխանություններին այս կամ այն կերպ մերձավոր կամ պատկանող բիզնես շրջանակների, ձեռնարկությունների հետ: