Նոր Զելանդիայում դատարանը հայտնի AC/DC խմբի թմբկահար Ֆիլ Ռադին դատապարտել է 8 ամսվա տնային կալանքի՝ թմրանյութեր պահելու և սպանության սպառնալիքի համար: Այս մասին հայտնում է BBC-ի ռուսական ծառայությունը:
Այն ամբողջ ընթացքում, որ երաժիշտը կգտնվի տնային կալանքի տակ Նոր Զելանդիայի Տաուրանգա քաղաքի իր տանը, նրան կհսկեն: Միևնույն ժամանակ, դատարանը Ռադին թույլատրել է հյուրեր ընդունել:
Դատական նիստից առաջ Ռադն իր երկրպագուներին շնորհակալություն է հայտնել աջակցության համար և հրաժարվել է գործի վերաբերյալ որևէ մեկնաբանությունից:
Դատախազությունը սկզբում կարծում էր, թե Ֆիլ Ռադը փորձել է երկու մարդու սպանության համար մարդ վարձել, սակայն հետո հրաժարվել է այդ մեղադրանքից՝ ապացույցների անբավարարության պատճառով: Իր մեղքը թմրանյութեր պահելու և սպանության սպառնալիքի մասով երաժիշտը խոստովանել է:
Գործի նյութերի համաձայն՝ Ռադը սպառնացել է անցած տարվա օգոստոսին իր առաջին Head Job սոլո ալբոմի թողարկմանը մասնակցած աշխատակցին: Երաժիշտը աշխատակցին սպառնացել է ալբոմի տապալումից հետո:
Ռադի փաստաբանը պնդել է, որ սպանության սպառնալիքները եղել են ընդամենը կատաղած մարդու հեռախոսազանգ, որը շատ է տանջվել ալբոմի տապալման պատճառով և եղել է թմրանյութերի ազդեցության տակ:
