Ռուս հայտնի գործարար Գերման Ստերլիգովը REN TV-ին տված բացառիկ հարցազրույցում պատմել է, թե ինչու է ինքը մեկնել Ռուսաստանից:
«Ես կպատմեմ հասարակ, պարզ, ճշմարտությունը, որը կարող է շատերին դուր չգալ, բայց, այնուամենայնիվ, դա ավելի լավ է այն ենթադրություններից, որ հիմա պատմում են իմ և իմ ընտանիքի մասին»,- ասել է գործարարը:
Ձեռնարկատերը շատ զարմանալի է համարում այն վայրը (Ղարաբաղ), որտեղ նա տեղափոխվել է. «Լեռնային Ղարաբաղը սքանչելի հող է՝ հրաշալի ժողովրդով: Եվ երջանիկ են այն հայերը, որոնք այդպիսի երկիր, այդպիսի պատմություն, այդպիսի գեղեցկություններ ունեն: Ես ճամփորդել եմ ամբողջ աշխարհում և այդպիսի վայր ոչ մի տեղ չեմ տեսել: Այդպիսի գեղեցկություն, այդպիսի պտղաբերություն և ամենագլխավորը՝ այդպիսի հարաբերություններ մարդկանց միջև՝ բարի և ջերմ: Այստեղ ընդհանրապես ագրեսիայի զրոյական մակարդակ է»:
Միաժամանակ Ստերլիգովը դիմել է նաև Ռուսաստանի քաղաքացիներին. «Եթե հիմա ինձ դիտում են ռուսներ, ասեմ, որ ձեզ դա անհնար է բացատրել: Ահա, ինձ հիմա լավ են վերաբերվում, քանի որ ես հյուր եմ, բայց ոչ միայն հյուրերի նկատմամբ են այդպիսին. նրանք իրար նույնպես հրաշալի են վերաբերվում: Այսինքն՝ դրա համար պետք է լինել այստեղ:
Ես երջանիկ եմ, որ այստեղ եմ բերել իմ երեխաներին, քանի որ ես նրանց պատմում էի, թե մարդիկ տեսականորեն ինչպես պետք է վերաբերվեն միմյանց: Որովհետև իրականում ժամանակակից Ռուսաստանում այդ հարաբերությունները, ցավոք, չկան: Իսկ Լեռնային Ղարաբաղում այն կա: Այստեղ նրանք այն տեսնում են: Եվ դա զարմանալիորեն օգտակար դաս է նրանց համար»:
Իր անկեղծ խոսքի վերջում ձեռնարկատերը ևս մեկ անգամ նշել է, թե որքան յուրահատուկ է Ղարաբաղը. «Այնպես որ՝ եկեք բոլորդ Լեռնային Ղարաբաղ՝ հասկանալու համար, թե ինչի մասին եմ խոսում: Սա եզակի վայր է աշխարհում: Սա մարդկային հնագույն հարաբերությունների արգելոց է, որը պահպանել է հայ ժողովուրդը»: