Հռոմի պապ Ֆրանցիսկոսը Էկվադորից Բոլիվիա թռիչքի ժամանակ փորձել է թեյ՝ պատրաստված կոկայի տերևներից։ Այս մասին հայտնում է Reuters գործակալությունը։
Հովվապետը որոշել է փորձել «Տրիմատե» անվանումով ըմպելիքը, որը պարունակել է նաև երիցուկ և անիսոնի սերմեր։ Այդ կերպ նա բարելավել է ինքնազգացողությունը երկրի մայրաքաղաք Լա-Պաս թռիչքի ժամանակ։
«Էլ-Ալտո» օդանավակայանում Ֆրանցիսկոսին դիմավորել է Բոլիվիայի նախագահ Էվո Մորալեսը, ով հանդես է եկել ողջույնի խոսքով։ Նախատեսված 15 րոպեանոց ելույթը կրճատվել և դարձել է 5 րոպե։ Նշվում է, որ մայրաքաղաքի դիրքը (ծովից 4 կմ բարձրության վրա) կարող էր վատ անդրադառնալ 78-ամյա Ֆրանցիսկոսի ինքնազգացողության վրա, ով միայն մեկ թոք ունի։
Մորալեսը նրան փոքրիկ պարկ է տվել՝ կոկայի տերևներով։ Կոկայի տերևներ ծամելու Պապի ցանկության մասին հունիսի 29-ին հայտնել էր Բոլիվիայի մշակույթի նախարար Մարկո Մաչիկաոն։ Նշենք, որ կոկայի տերևները համարվում են կոկաինի արտադրության համար հումք։
