«Լավ եմ, պինդ եմ ու ինչպես վստահ սկսել եմ, այնպես էլ շարունակելու եմ»,- ասաց երեկվանից Ազատության հրապարակում անժամկետ հացադուլ սկսած ակտիվիստ, Երևանի ավագանու «Բարև Երևան» խմբակցության անդամ, «Ժառանգություն» կուսակցության մամուլի խոսնակ Դավիթ Սանասարյանը:
Դավիթը ևս մեկ անգամ ընդգծեց, որ ինքն իր ծայրահեղ քայլով պահանջ չի ուղղում Սերժ Սարգսյանին, իշխանություններին, այլ իր պահանջը ուղղված է ժողովրդին, ՀՀ քաղաքացիներին՝ հավաքվել Ազատության հրապարակում, միակամ լինել և հասնել լուծման:
«Եթե լուծում են ուզում, եթե ուզում են մնալ Հայաստանում, այլ ոչ թե արտագաղթել, ապա պետք է պայքարել, քանի որ մի օրում ոչինչ չի լուծվում: Մենք պետք է քայլ առ քայլ մեր խնդիրները լուծենք: Քաղաքացիները պետք է ճնշեն իշխանություններին և նրանց պարտադրեն գնալ զիջումների»,- հավելեց Դավիթ Սանասարյանը:
Նա նշեց, որ շատ դժվար է կայացրել հացադուլի որոշումը, ծնողները դեմ են եղել, բայց ինքը երկար մտածելուց հետո հասկացել է, որ շարժումը պետք է թարմացնել: «Իսկ սա միջոց է, որով ես կարող եմ խոսել քաղաքացիների հետ: Նրանք պետք է գան հրապարակ և բովանդակություն տան իրենց պահանջներին»,-նկատեց Դավիթը:
Նա նշեց, որ անտարբերությամբ է վերաբերվում իրեն քննադատողներին: Դավիթի խոսքով՝ լավ կլինի այդ քննադատողները ֆեյսբուքից դուրս գան ու գան հրապարակ, այլ ոչ թե իրենց քայլերով ու ստատուսներով ծառայություն մատուցեն իշխանություններին:
Դավիթը նաև նշեց, որ եթե հինգշաբթի օրը Ազատության հրապարակում հավաքվի անհրաժեշտ թվով մարդ, ապա ինքը հնարավոր է դուրս գա հացադուլից ու շարունակի պայքարը:
«Մենք նորից վերադառնալու ենք Բաղրամյան: Ես դա ձեզ ասում եմ»,- հայտարարեց Դավիթ Սանասարյանը:
