Ադրբեջանական Turan լրատվական գործակալությանը տված հարցազրույցում Բաքվում գտնվող ԵԱՀԿ Մինսկի խմբի ամերիկացի համանախագահ Ջեյմս Ուորլիքն անդրադարձել է Ղարաբաղյան հակամարտության կարգավորման խնդրին:
Ուորլիքը հայտնել է, որ Երևանից մյուս համանախագահների, ինչպես նաև ԵԱՀԿ գործող նախագահի անձնական ներկայացուցիչ Անջեյ Կասպրշչիկի հետ ժամանել է Բաքու, որտեղ նույնպես քննարկելու են Հայաստանի ու Ադրբեջանի նախագահների հանդիպման հարցը:
«Երկու նախագահներն էլ հայտնել են, որ ցանկանում են հանդիպել միմյանց հետ, նրանք համաձայնվել են ինտենսիվացնել երկխոսությունը, և մենք պետք է նրանց օգնենք այդ հարցում: Պետք է անել այնպես, որ ապագա հանդիպումը լինի արդյունավետ: Հուսով եմ, որ այդ հանդիպումը տեղի կունենա այս տարի: Դա կախված է երկու երկրների նախագահներից:
Մենք կցանկանայինք, որ դա լիներ ոչ թե հանդիպում հանուն հանդիպման, այլ ունենար դրական արդյունք, որ քննարկվող հարցերում լիներ առաջընթաց: Հենց դրա համար էլ մենք կանոնավորապես հանդիպում ենք արտգործնախարարների հետ:
Մյուս միջնորդների (համանախագահների) հետ մենք կարող ենք լինել օգտակար, դրա համար անհրաժեշտ է խորապես իմանալ Հայաստանի ու Ադրբեջանի կյանքի բոլոր ասպեկտները, որպեսզի համադրես տարբեր մոտեցումները, փաթեթները, որոնցում յուրաքանչյուր կողմը տեսնում է իր շահը:
Միակ բանը, որը ես հասկացել եմ իմ միջնորդության ժամանակ՝ այն է, որ չպետք է լինեն հաղթողներ ու պարտվողներ: Պետք է լինի միայն երկու հաղթող: Ես հավատում եմ, որ Ղարաբաղյան հակամարտությունն այնպիսի հակամարտություն է, որի դեպքում կարելի է գտնել այնպիսի որոշում, որը կծառայի Հայաստանի ու Ադրբեջանի շահերին:
Ես հավատում եմ, որ եթե լինի երկու նախագահների քաղաքական կամքը` երկու երկրների ժողովուրդների աջակցությամբ, ապա հակամարտությունը կկարգավորվի»,- ասել է Ուորլիքը:
Ուորլիքը հիշեցրել է, որ ԵԱՀԿ Մինսկի խմբի ամերիկացի համանախագահի պաշտոնը ստանձնել է պետքարտուղար Ջոն Քերիի խնդրանքով, ով հավատում է հակամարտության կարգավորմանը: Նա ընդգծել է, որ ԼՂ հարցում ԱՄՆ-ի ու Ռուսաստանի միջև չկան տարաձայնություններ:
Ուորլիքը հավելել է, որ ԵԱՀԿ Մինսկի խմբի համանախագահներն ակտիվորեն աջակցում են Հայաստանի ու Ադրբեջանի քաղաքացիական հասարակությունների միջև շփումներին:
Ուորլիքն ընդգծել է, որ Երևանում հանդիպել է կառավարության հետ չկապված երիտասարդների հետ և ծանոթացել Ղարաբաղյան հակամարտության կարգավորման նրանց տեսլականին. «Ինձ հետաքրքիր էր, թե ինչպես են նրանք տեսնում Ղարաբաղյան հակամարտության կարգավորումն ու դրա հետ կապված խնդիրները: Ես կցանկանայի, որ այդ զրույցներին ներկա գտնվեին նաև ադրբեջանցիներ, քանի որ երիտասարդության հետ մի շարք զրույցների էությունը զգալիորեն տարբերվում է այն հեռանկարներից, որոնք ես լսել եմ ԱԳՆ-ում»:
Անդրադառնալով Ադրբեջանի կողմից պատերազմի վերսկսման հնարավորությանը` Ուորլիքը հայտարարել է, որ դա կլիներ վատագույն տարբերակը. «Դա կհանգեցներ այլ կողմերի ներգրավմամբ հակամարտության ընդլայնմանը և էսկալացիայի խորացմանը, ինչը կխախտեր մեր միջնորդական առաքելությունը: Դրա համար էլ մենք ձգտում ենք հասնել հրադադարի ռեժիմի պահպանմանն ու խուսափել բռնություններից»:
Ուորլիքը նկատել է, որ ողջ բանակցային գործընթացի ընթացքում մի քանի անգամ ի հայտ են եկել Ղարաբաղյան հակամարտության խաղաղ կարգավորման հնարավորություններ, սակայն կողմերը, դժբախտաբար, չեն օգտագործել այդ հնարավորությունները. «Նոր հնարավորություն կա նաև ներկայումս, անհրաժեշտ է օգտագործել այն: Ես չեմ ցանկանում նվազեցնել առկա դժվարությունները, սակայն քաղաքական կամքի առկայության դեպքում հակամարտությունը լուծելի է: Դրա այլընտրանքը կլիներ պատերազմը: Չեմ կարծում, թե երկու երկրների ժողովուրդները ցանկանում են դա:
Ես բավական շատ եմ շփվել նախագահներ Սարգսյանի ու Ալիևի հետ և կարող եմ ասել, որ նրանք չեն ցանկանում պատերազմ, ցանկանում են խաղաղ կարգավորում, ինչի համար էլ մենք օգնում ենք նրանց»: