«Տաշիր» մրցանակաբաշխության բարձրացրած մեծ դժգոհությունը և աղմուկը առիթ հանդիսացան «Օգնի՛ր քեզ» հասարակական կազմակերպության ստեղծման համար:
ՀԿ-ն կոչ է անում, որ մարդիկ ոչ թե պահանջեն, որպեսզի արտիստները հրաժարվեն իրենց ստացած բնակարաններից, այլ ինքնուրույն օգնեն կարիքի մեջ գտնվող մարդկանց: ՀԿ-ն գրանցվել է երեկ, արդեն ունի 150 ակտիվ անդամ: ՀԿ նախագահ Սամվել Հովհաննիսյանի խոսքով, «Օգնի՛ր քեզ»-ը քաղաքական կամ տնտեսական որևէ շահ չի հետապնդում, գործելու է թափանցիկ և պարբերաբար ներկայացնելու է կատարած աշխատանքների հաշվետվությունը:
Այսօր Խնկո-Ապոր անվան ազգային մանկական գրադարանում տեղի ունեցավ «Օգնի՛ր քեզ»-ի առաջին բարեգործական դրամահավաքը, որի արդյունքում հավաքված ողջ գումարով ֆինանսավորվելու է մի 16-ամյա հիվանդ երեխայի երիկամի փոխպատվաստման վիրահատությունը:
«ՀԿ անդամները ոչ միայն ֆինանսական օգնություն են ցույց տալու կարիքի մեջ գտնվող մարդկանց, այլև իրենց մասնագիտական ծառայություններն են պատրաստ առաջարկել»,- ասում է ՀԿ նախագահ Սամվել Հովհաննիսյանը:
«Օգնի՛ր քեզ» ՀԿ-ն նպատակ ունի օգնելու նրանց, ովքեր պետական աջակցություն չեն ստանում, այդ թվում` առաջին հերթին սահմանամերձ գյուղերի բնակիչներին:
