Բելառուսում ստեղծված արժութային ճգնաժամը պայմանավորված է համաշխարհային շուկայում վառելիքի և հումքի գների աճով: Այս մասին այսօր հայտարարել է Բելառուսի նախագահ Ալեքսանդր Լուկաշենկոն:
Նա նշել է, որ «նավթի գները վերջին մի քանի ամիսներին կրկնակի աճել են», թեև վերջին երեք ամիսներին իրականում նավթի գները աճել են մոտ 20%-ով: Նախկինում Լուկաշենկոն այլ պատճառաբանություն էր բերել Բելառուսում ստեղծված արժութային ճգնաժամի պատճառների մասին` նշելով, որ դա կապված է մեքենաների ներմուծման մաքսատուրքերի բարձրացման հետ:
Հիշեցնենք, որ մարտ ամսից Բելառուսում արժութային ճգնաժամը խորացավ. Բելառուսի ազգային արժույթը սկսեց կտրուկ արժեզրկվել: Մասնագետները այն պայմանավորում են նախևառաջ Բելառուսի արտահանման ծավալների կտրուկ կրճատմամբ և ներմուծման աճով:
Իշխանությունները մարտի սկզբից մի շարք արժութային սահմանափակումներ մտցրեցին: Օրինակ` ներմուծողներին արգելվեց երկրում 50 հազար դոլարից ավելի արտարժույթ գնել, որի արդյունքում Samsung-ն անմիջապես հեռացավ բելառուսական շուկայից: Սահմանվեց, որ արժութային բորսայում փոխարժեքի փոփոխությունները կատարվում են հայտերը ներկայացնելուց 30 օր հետո (նախկինում այն տևում էր սովորաբար 1 օր):
Արդյունքում բորսայից դուրս հայտնվեցին սպեկուլյանտները, և որոշ գնահատականներով, վերջին օրերին բելառուսական արժույթի պաշտոնական փոխարժեքի և սև շուկայում ձևավորված կուրսի տարբերությունն անցավ 25%-ից: