Նախօրեին լրագրողների հետ հանդիպման ժամանակ Միացյալ Նահանգների պետքարտուղար Հիլարի Քլինթոնը հայտարարել է, որ Հյուսիսատլանտյան դաշինքը սկսել է վերանայել իր պաշտպանական և զսպման դոկտրինը: Այսպիսի որոշում է կայացվել ՆԱՏՕ-ի նախարարների խորհրդի Բեռլինում կայացած ոչ պաշտոնական հանդիպման ժամանակ:
Նա հատուկ շեշտել է, որ վերանայման նպատակն է որոշել, թե սովորական, միջուկային և հակահրթիռային սպառազինությունների ինչպիսի համադրում է անհրաժեշտ ՆԱՏՕ-ին ապագայում: Նա տեղեկացրել է, որ ինքը ներկայացրել է ԱՄՆ դիրքորոշումն այս կապակցությամբ և առաջնային է համարել դոկտրինի ընդունումը 2012թ.-ին, երբ ԱՄՆ-ն կկազմակերպի ՆԱՏՕ-ի գագաթնաժողովը:
Հիշեցնենք, որ Հիլարի Քլինթոնը նաև անդրադարձել է Լիբիայի խնդրին, ինչպես նաև Իրանի կողմից հարևան երկրների գործերին միջամտելուն և սեփական օրակարգն առաջադրելուն:
Այս մասին հաղորդում է ITAR-TASS գործակալությունը:
