Ռոբերտ Նազարյանը շաբաթ առավոտյան հյուրընկալել էր «Ազատություն» ռադիոկայանին և ի թիվս այլ ուշագրավ արտահայտությունների՝ ասաց, որ եթե ինքն ասի՝ չի բեկանելու իր իսկ կայացրած որոշումը էլեկտրաէներգիայի սակագնի թանկացման մասին, ապա ժողովրդի աչքին կարող է «բոբո» երևալ:
Եթե համարենք, որ բոբոն ոչ թե պոզով-պոչով հեքիաթային կերպար է, որից վախենում են վառ երևակայություն ունեցող երեխաները, այլև պետական պաշտոնյան, որ իր գործառույթների, մեղմ ասած, պատշաճ չկատարման պատճառով դարձել է մի ամբողջ ժողովրդի աղքատացման հովանավոր, ապա ակնհայտ է՝ Ռոբերտ Նազարյանը, այսպես թե այնպես, չի խուսափի իր իսկ ասած «էպիտետից»:
Ասվածը ապացուցելու համար ներկայացնենք խախտման երկու օրինակ, որը թույլ է տրվել Ռոբերտ Նազարյանի ղեկավարած կառույցի կողմից, ինչի արդյունքում ՀԷՑ-ը կուտակել է 37 մլրդ դրամի պարտք, որի մարման համար արդեն երկրորդ անգամ բարձրացվում է էլեկտրաէներգիայի սակագինը:
Խախտում 1
Դեռևս 2011 թվականին ուժի մեջ մտած «Գնումների մասին» ՀՀ օրենքով սահմանվել է, որ հանրային ծառայություններ իրականացնող ընկերությունները, այդ թվում և «Հայաստանի էլեկտրական ցանցերը», իրենց գնումների ողջ տեղեկատվությունը պետք է պատշաճ կերպով հրապարակեն ինչպես գնումների ռեգիստրում, այնպես էլ իրենց կայքերում: Այդ դրույթը կոպիտ կերպով խախտվել է և չի իրականացվել որևէ հանրային ծառայություններ մատուցող ընկերության կողմից, և դրա համար այդ ընկերությունները պատասխանատվության չեն ենթարկվել, լիցենզիայից չեն զրկվել, շարունակել են գնումներն իրականացնել իրենց ուզած ձևով, և միակ պաշտպանությունը, որից այսօր օգտվում է ՀԾԿՀ-ն, այն է, որ ոչ մի շռայլություն ընդգրկված չէ սակագնի հաշվարկի մեջ: Ըստ էության, ՀԾԿՀ-ն խախտել է «Հանրային ծառայությունները կարգավորող մարմնի մասին» ՀՀ օրենքի հոդված 5-ի «գ» ենթակետը, համաձայն որի՝ նա պետք է ապահովեր կարգավորող մարմնի թափանցիկությունը:
Խախտում 2
Դեռևս 2004 թվականի սեպտեմբերի 16-ին Հանրային ծառայությունները կարգավորող հանձնաժողովն ընդունել է Կարգ 111-Ն, համաձայն որի՝ պետք է ապահովվեր էլեկտրաէներգիա արտադրող ընկերությունների անխափան և առաջնահերթ վճարումները մատակարարված էլեկտրաէներգիայի դիմաց: Այդ նպատակով ՀԾԿՀ-ն ՀԷՑ-ի համար բացել է հատուկ գրավային հաշիվներ, որտեղ պետք է կուտակվեին էլեկտրաէներգիայի դիմաց բաժանորդների կողմից կատարված բոլոր վճարումների գումարները: Համաձայն վերոնշյալ կարգի՝ այդ գրավային հաշիվներից կատարվող վճարումների հերթականությունը և գումարները պետք է համաձայնեցվեին ՀԾԿՀ-ի հետ:
Բայց ստացվել է այնպես, որ էլեկտրաէներգիա մատակարարող ընկերությունները ոչ թե առաջինն են ստանում իրենց վճարումները, այլ վերջինը, քանի որ բազմաթիվ այլ ծառայություններ մատուցող ընկերություններ անմիջապես են ստանում իրենց վճարումները և չեն բողոքում, իսկ էլեկտրաէներգիա մատակարարող ընկերությունները առնվազն երեք ամսվա չվճարված հաշիվներ ունեն, ինչի մասին բողոքում են,և ինչի մասին բացեիբաց հայտարարել է ՀԾԿՀ նախագահը ԱԺ լսումների և հարցազրույցների ընթացքում: Այնպես որ՝ Հանրային ծառայությունները կարգավորող հանձնաժողովը ինքն է թույլատրել վճարումներ կատարել մատակարարներին իր իսկ կարգին հակասող հաջորդականությամբ, և ընկերությունն առաջին հերթին վճարել է շռայլության, այլ ոչ թե էլեկտրաէներգիայի դիմաց:
Բացի այդ, մենք տեղեկություն ունենք ՀԾԿՀ-ի և ՀԷՑ-ի միջև կայացված մեկ այլ խայտառակ գործարքի մասին: Ըստ այդ տեղեկության՝ մարտի 20-ին փոփոխություն է կատարվել ՀԾԿՀ և ՀԷՑ-ի միջև էլեկտրաէներգիայի մատակարարման պայմանագրում, որից հետո ՀԾԿՀ-ն իր սպառած էլեկտրաէներգիայի դիմաց վճարումները կատարել է ոչ թե հատուկ գրավային հաշվին, այլ ազատ հաշվի, որտեղ եղած գումարները ՀԷՑ-ը կարող էր օգտագործել ըստ իր հայեցողության:
Մնում է պարզել, թե էլի քանի սպառողներ են իրենց սպառած էլեկտրաէներգիայի դիմաց վճարել ոչ թե հատուկ հաշվին, այլ ՀԾԿՀ վերահսկողությունից դուրս գտնվող հաշիվներին:
Լուսանկարը՝ civilnet.am-ի
