«ԵՏՄ-ում Վովա Գասպարյանը կճանաչվի լավագույն ոստիկանապետ»,- «Առաջին լրատվական»-ի հետ զրույցում ասաց «Լրագրողներ՝ հանուն մարդու իրավունքների» ՀԿ նախագահ, իրավապաշտպան Ժաննա Ալեքսանյանը՝ անդրադառնալով ոստիկանության կողմից լուսադեմին նստացույցի մասնակիցների նկատմամբ կիրառված աննախադեպ բռնություններին:
«Աննախադեպ բռնություններ լրագրողների և խաղաղ ցուցարարների, հրաշալի երիտասարդության նկատմամբ, ցույց են տալիս, որ երկիրը խորը ճգնաժամ են տանում։ Ակնհայտ է, որ ծեծուջարդով են փորձելու իշխանությունը պահել։
Վովա Գասպարյանն ուզում էր ասել, որ այլ արժեքներ չեն գործելու այս երկրում, ով սիրով կատարել է բարձր իշխանության հրամանը, քանի որ ինքն էլ կրում է այդ արժեքները։ Ոստիկանապետն առավել ճիշտ է ընտրել իր կադրերին, որոնք հայտնի են որպես բռնի գործողությունների սիրահարներ՝ Աշոտ Կարապետյան, Լևոն Երանոսյան և այլք»,- ասաց նա։
Նրա խոսքով՝ ՀՀ ոստիկանությունը երբեք չի բարեփոխվի. «Այլասերված մտածողություն է, որ հրեշտակները պետք է բռնի գործողություններ կատարեն քաղաքացիների նկատմամբ՝ չխնայելով ոչ ոքի։ Եվ բռնի ուժը կիրառել են քաղաքացիական հագուստով բանդաները, որ ստեղծել է ոստիկանապետը»։
Նրա խոսքով՝ ոչ մի միջազգային կառույցի արձագանք հաշվի չի առնվում, ստացվում է՝ մարդիկ իրավունք չունեն բողոքելու, երբ նստացույցի մասնակիցները ոչ մի հակաօրինական գործողություն չեն կատարել։ Նրանք մինչև վերջ իրացրել են իրենց իրավունքը։ Պարզ է, որ սա ուժի ցուցադրություն է, և ոստիկանապետը վայելել է այսօրվա լուսադեմը։
«Նա հայտնի է որպես բռնություն կիրառող անձ. սա պետք է հասկանալ։ Եվ եթե Սերժ Սարգսյանը նրան ասում է` գնա ցրի, ինքը ցրելու և մարդկանց հողին հավասարեցնելու իր մեթոդներն ունի։ Ցավում եմ, որ այսպիսի վարկաբեկված ոստիկանություն ունենք»,- ասաց նա՝ հավելելով, որ սա նույն Մարտի 1-ի իրականությունն է, ոչինչ չի փոխվել։
Նրա խոսքով՝ Սերժ Սարգսյանը բռնություններով է ամրացնում իր իշխանությունը և այսպես է պահելու իրեն՝ մանավանդ, որ Ռուսաստանն էլ է այդ արժեքները բարձր գնահատում։
