ԵԱՀԿ Մինսկի խմբի համանախագահների սպասվելիք հանդիպումը ԱՄՆ պետքարտուղար Հիլարի Քլինթոնի հետ, ըստ քաղաքագետ Երվանդ Բոզոյանի, ապացուցում է այն հանգամանքը, որ ռուսներն ու ամերիկացիները տարբեր փուլերում ակտիվանում են:
«Կարծում եմ, որ բացի տակտիկական խնդրից, որը միջնորդները փորձում են կիրառել, գերտերությունների միջև կան նաև մրցակցային տարրեր, ինչը նորմալ է: Եթե ռուսական միջնորդությունները ինչ-որ մի փուլում հաջողությամբ չեն պսակվում, ապա բնականաբար մյուս կողմն է փորձում իր լուման դնել այդ գործընթացում: Դա կարուսելի նման մի պրոցես է, և ավելի լավ է, քան պատերազմը»,- «Առաջին լրատվականի» հետ զրույցում նշեց Բոզոյանը:
Քաղաքագետի խոսքերով, հաշվի առնելով այն հանգամանքը, որ այս փուլում ռուսական միջնորդությունը հաջողության չհասավ` Ամերիկան է փորձում իր հարթության մեջ նույն գործընթացն իրականացնել:
«Չեմ կարծում, որ նրանց էլ կհաջողվի լուրջ առաջընթաց արձանագրել, քանզի սա այնպիսի կոնֆլիկտ է, որը մեկ տարում չի լուծվում»,- ընդգծեց քաղաքագետը:
Բոզոյանի գնահատմամբ, միջնորդներն ամեն ինչ անում են, որպեսզի ԼՂ չլուծված խնդիրը չվերածվի լայնամասշտաբ պատերազմի, քանզի այն կարող է ներառել շատ լուրջ գործոններ, հնարավոր է նաև Թուրքիան ակտիվորեն ներգրավվի այս գործընթացում, ինչը չի ընդունվի Ռուսաստանի կողմից:
