Եգիպտոսի իշխանությունները որոշում են կայացրել ապաքինումից անմիջապես հետո ճաղերի հետևում պահել այդ երկրի նախկին նախագահ Հոսնի Մուբարաքին:
Այս մասին հաղորդում է France Presse գործակալությունը:
Երեկ մենք տեղեկացրել էինք, որ Եգիպտոսի դատախազությունը նաև որոշում էր կայացրել Մուբարաքին Կահիրեում գտնվող զինվորական հոսպիտալ տեղափոխելու մասին, քանի որ երկրի նախկին ղեկավարը դեռ պետք է մնա բժիշկների հսկողության տակ:
Եգիպտոսի երիտասարդական կազմակերպություններն ու նախաձեռնությունները նույնպես կոչ են անում բաց, հրապարակային դատավարություն անցկացնել Մուբարաքի դեմ: «Մենք պահանջում ենք բաց դատավարություն, որպեսզի այն հեռարձակվի հեռուստատեսությամբ», օտարերկրյա լրագրողների հետ հանդիպման ժամանակ ասել է «Հեղափոխական երիտասարդության միավորման» ներկայացուցիչ Իսրա Աբդ Ալ-Ֆաթահը:
Մուբարաքի և նրա ընտանիքի անդամների ձերբակալության մասին հայտնի է դարձել ապրիլի 13-ին, երբ դատախազությունը Գամալին և Ալային կալանավորել էր հարցաքննությունից հետո, իսկ քիչ անց հայտնի է դարձել նաև Մուբարաքին կալանքի տակ դնելու որոշման մասին: Մուբարաքները մեղադրվում են կոռուպցիայի, պաշտոնական դիրքի չարաշահման, խաղաղ ցուցարարների դեմ զենք օգտագործելու հրաման տալու մեջ: