Ռուս-պարսկական պատերազմի ընթացքում 1827թ. տեղի ունեցած Օշականի ճակատամարտում ընկած ռուս զինվորների հիշատակին նվիրված հուշահամալիրի հանդիսավոր բացումը տեղի կունենա ապրիլի 19-ին` Հայ-ռուսական առաջին միջմարզային համաժողովի շրջանակներում: Հիշեցնենք, որ համաժողովի կազմակերպիչներն են «Ռոսսոտրուդնիչեստվոե դաշնային գործակալությունը, «Եվրասիական հետազոտությունների ինստիտուտե ռուսական հիմնադրամն ու Հայկական զարգացման գործակալությունը: Համաժողովին կմասնակցեն Ռուսաստանի ավելի քան 20 մարզերից ժամանած պատվիրակություններ` մեծամասամբ նահանգապետերի գլխավորությամբ: Համաժողովի բացումը տեղի կունենա ապրիլի 19-ին Ռուսաստանի նախագահի աշխատակազմի ղեկավար Սերգեյ Նառիշկինի և Հայաստանի ղեկավարության մասնակցությամբ:
Ինչպես հաղորդվել էր ավելի վաղ, Օշականի հուշահամալիրի բարեկարգման մտահղացումը պատկանում է Հայաստանում Ռուսաստանի դեսպան Վյաչեսլավ Կովալենկոյին, իսկ վերականգնման աշխատանքներն իրականացնում է «Պատվի գործե հայ-ռուսական բարեգործական կազմակերպությունը, որի նախագահ Անդրանիկ Նիկողոսյանը նախօրեին հանդիպել է ռուսական մի շարք լրատվամիջոցների ներկայացուցիչների հետ: Նիկողոսյանն ընդգծել է երկու ժողովուրդների պատմական հիշողության պահպանման կարևորությունը` հայտնելով, որ ընդհանուր պատմության հուշարձաններին նոր շունչ տալու սկիզբ առած գործընթացը շարունակական բնույթ է կրելու:
Օշականի ճակատամարտը Ռուս-պարսկական պատերազմի հերոսական էջերից է: 1827թ. օգոստոսի 17-ին պարսից շահ Աբբաս Միրզայի զորքերը պաշարել էին Էջմիածինը, որի փրկությանն էր շտապում ռուսական զորախումբը` Ա. Կրասովսկու գլխավորությամբ: Պարսիկները ճակատամարտը տանուլ տվեցին: Որոշում ընդունվեց Օշականում ռուս զինվորների հիշատակը հավերժացնող հուշահամալիր կանգնեցնել, որի բացումը կայացավ 1834թ.: Մեր օրերում Օշականի հուշահամալիրը հայտնվել էր անմխիթար վիճակում: «Օշականի հուշահամալիրի վերածնունդ» ծրագրի շրջանակներում դրան նոր շունչ հաղորդվեց:
