«ԵԱՀԿ Մինսկի խմբի վերջին հայտարարությունից պարզ դարձավ, թե ինչքանով են նրանք գերի դարձել երկու հակամարտող կողմերի դիրքորոշմանը: Անընդհատ ձևակերպումներ են օգտագործում, որոնք կարծես թե ոսկե միջինը որոնելու ցանկություն է, սակայն իրականում նման դիրքորոշումը չի նպաստում կարգավորմանը»,- անդրադառնալով ԵԱՀԿ Մինսկի խմբի համանախագահների հայտարարությանը` «Առաջին լրատվականի» հետ զրույցում կարծիք հայտնեց քաղաքագետ Հրանտ Մելիք-Շահնազարյանը:
Մելիք-Շահնազարյանի համար ուշագրավ է այն հանգամանքը, որ հայտարարության մեջ նշված է, թե այցելել են Երևան, Լեռնային Ղարաբաղ և Բաքու. «Դա վկայում է այն մասին, որ համանախագահները պարզապես վախեցել են Ստեփանակերտ բառն օգտագործել, որպեսզի Ադրբեջանում չլինի Խանքենդիի հետ կապված դժգոհություն»:
Իսկ այն հանգամանքը, որ հայտարարության մեջ նշված է, որ հանդիպել են Հայաստանի, Ադրբեջանի նախագահների և ԼՂ դե ֆակտո գոյություն ունեցող իշխանությունների հետ, ըստ Մելիք Շահնազարյանի, վկայում է այն մասին, որ այս հայտարարությունը պարզապես մի հերթական քայլ է` ցույց տալու, որ ԵԱՀԿ Մինսկի խումբը գործում է: «Սակայն վերջին տարիների բոլոր հայտարարությունները և սա էլ վկայում են, որ ՄԽ գործունեությունն անարդյունավետ է և խաղաղ կարգավորման ելքեր որոնելու փոխարեն նրանք պարզապես մտածում են ինչպես անել, որ հակամարտող կողմերը շարունակեն համագործակցել իրենց կառույցի հետ»:
