Աբովյանում քաղաքապետի ընտրություններին ընդառաջ՝ թեկնածուների միջև կրքերն ավելի են շիկանում:
«Առաջին լրատվական»-ի տեղեկություններով՝ երեկ Երևանում վիճաբանել են Ծառուկյանի թեկնածու Վահագն Գևորգյանը և Ծառուկյանի մորաքրոջ թոռ՝ թեկնածու Էդվին Թադևոսյանը: Ըստ այդ տեղեկությունների՝ նրանք հանդիպել են՝ զրուցելու ընտրությունների հետ կապված կազմակերպչական և կեղծիքների կանխման հարցերի շուրջ, ինչը վերածվել է քաշքշուկի: Բանը հասել է տրանսպորտի և կապի նախարար Գագիկ Բեգլարյանի միջամտությանը: Վերջինս եկել ու նրանց բաժանել է:
Այս տեղեկության վերաբերյալ «Առաջին լրատվական»-ը փորձեց մեկնաբանություններ ստանալ Էդվին Թադևոսյանից, սակայն վերջինս ժխտեց, որ իրենք հանդիպել են. «Նա ով է, որ ես իր հետ միջադեպ ունենամ, չի կարա տենց բան լինի, ես որ հանդիպելու ունենամ, իր տերերի հետ կհանդիպեմ»,- ասաց նա:
