Ամերիկացի հայտնի ռեժիսոր Սթիվեն Սփիլբերգը ուրբաթ օրը ներկայացրել է սառը պատերազմի մասին իր նոր ֆիլմի («Լրտեսների կամուրջ») առաջին թրեյլերը: Ֆիլմում նկարահանվել են Թոմ Հենքսը և Մարկ Ռայլենսը: Ֆիլմը, որը վարձույթ դուրս կգա այս տարվա հոկտեմբերի 16-ին, հոլիվուդյան քննադատների կողմից արդեն արժանացել է դրական արձագանքների։ Այս մասին գրում է TASS-ը:
Ֆիլմի սյուժեն հիմնված է խորհրդային հետախույզ Ռուդոլֆ Աբելի և ամերիկացի օդաչու Ֆրենսիս Փաուերսի իրական պատմության վրա:
Հենքսը մարմնավորում է իրավաբան Ջեյմս Դոնովանին, ով ԿՀՎ-ից գաղտնի հանձնարարություն էր ստացել՝ ներկայացնելու Աբելին ամերիկյան դատարանում, իսկ հետո մասնակցել Փաուերսի հետ նրա փոխանակման բանակցություններին։ Խորհրդային հետախույզին մարմնավորում է բրիտանացի Մարկ Ռայլենսը, ով հայտնի է Շեքսպիրի պիեսներում իր խաղացած դերերով:
