Show TV հեռուստաալիքին տված հարցազրույցի ժամանակ Թուրքիայի նախագահ Ռեջեփ Էրդողանն արևմտյան մի շարք ԶԼՄ-ների մեղադրել է այն ուժերին աջակցելու համար, որոնք ձգտում են թուլացնել ու մասնատել երկիրը:
Էրդողանն ընդգծել է, որ Թուրքիայի վրա արևմտյան ԶԼՄ-ների հարձակումները մեծ պատմություն ունեն՝ հիշեցնելով նախորդ տարիներին Օսմանյան կայսրության սուլթանների և Թուրքիայի առաջնորդների դեմ ամերիկյան The New York Times թերթում տպագրված քննադատական հոդվածների մասին:
Էրդողանի խոսքով՝ արևմտյան ԶԼՄ-ների այդ քաղաքականությունն անցկացվում է նաև ներկայումս. «Հասկանալի է, թե ով է կանգնած դրա հետևում:
Դրանք (ԶԼՄ-ները) շարժվում են այն ուղղությամբ, որը նրանց առջև սահմանում են: BBC-ն ու CNN-ը նույնը արել են Գեզի այգու համար բողոքի ակցիաների ժամանակ: Դուք գիտե՞ք, թե ինչ նպատակ են հետապնդում նրանք:
Նրանք ցանկանում են թուլացնել Թուրքիան, մասնատել և կուլ տալ այն: Սակայն մենք թույլ չենք տա, որ դա տեղի ունենա, նրանք չեն հասնի հաջողության»:
Մայիսի վերջին The New York Times-ն իր հոդվածում Էրդողանին մեղադրեց երկրում «պնդօղակները ձգելու» համար: Էրդողանը դա համարեց որպես Թուրքիայի ներքին գործերին միջամտություն՝ ընդգծելով, որ թերթին երբևէ թույլ չեն տվել նման քննադատություն հասցեագրել ԱՄՆ-ի իշխանություններին:
