Sputnik-Georgia լրատվական գործակալության փոխանցմամբ՝ ՆԱՏՕ-ի գլխավոր քարտուղար Յենս Սթոլթենբերգը խոստացել է 2015 թվականին այցելել Վրաստան:
Այս մասին ՆԱՏՕ-ի շտաբ-բնակարանում նրա հետ հանդիպումից հետո հայտարարել է Վրաստանի պաշտպանության նախարար Թինա Խիդաշելին:
Հանդիպման ժամանակ կողմերի ուշադրության կենտրոնում են եղել Վրաստանում վարժանքների անցկացման համատեղ կենտրոնի բացումը, ինչպես նաև ՆԱՏՕ-ի գնահատականները:
Խիդաշելին հայտարարել է, որ արդեն իսկ ընդունվել է այդ կենտրոնի գտնվելու վայրի մասին որոշումը, և որ վրացական կողմը սպասում է ՆԱՏՕ-ի պատասխանին:
Հանդիպման ժամանակ քննարկվել են նաև ՆԱՏՕ-Վրաստան հարաբերությունները և 2014 թվականի սեպտեմբերին Ուելսում տեղի ունեցած ՆԱՏՕ-ի գագաթնաժողովի արդյունքներով ընդունված միջոցների փաթեթի ուղղությունները:
Քննարկման գլխավոր թեմաներից մեկն էլ եղել է ՆԱՏՕ-ի առաջիկա գագաթնաժողովը, որն անցկացվելու է 2016 թվականի հուլիսին Վարշավայում: Վրացական կողմը հուսով է, որ դրա արդյունքներով կհաջողվի հասնել ՆԱՏՕ-ին անդամակցելու գործողությունների պլանի (MAP) ստացմանը:
Հիշեցնենք, որ այն բանից հետո, ինչ Վրաստանին չհաջողվեց Ուելսի գագաթնաժողովի արդյունքներով ստանալ MAP, Վրաստանի նախկին նախագահ Միխեիլ Սաակաշվիլին հայտարարեց, որ դա նման է նրան, երբ մարդուն հրավիրում են ճաշի, սակայն փոխարենը նրան տալիս են չուփա-չուփս:
