Սքոթլանդ-Յարդը հայտարարել է 2 մարդու ձերբակալման մասին, որոնք կարող են առնչություն ունենալ Victoria’s Secret ներքնազգեստի խանութի 21-ամյա վաճառողի վրա հարձակման աղմկահարույց գործին, հաղորդում է The Telegraph-ը:
2012թ. դեկտեմբերի 30-ին նիկաբ հագած անհայտ կինը ծծմբական թթու էր լցրել գիշերը աշխատանքից վերադարձող աղջկա՝ Նաոմի Օնիի դեմքին: Դրա հետևանքով աղջիկը ստացել էր դեմքի լուրջ վնասվածքներ:
Սքոթլանդ Յարդի մամլո քարտուղարը հայտնել է, որ իրավապահները ձերբակալել են մի 21-ամյա կնոջ և 28-ամյա տղամարդու: Ներկայում իրավապահները փորձում են ճշտել նրանց առնչությունը պատահարին: Հետաքննության շահերից ելնելով նրանց անունները չեն հրապարակվում:
Դեդեկտիվները հերքել են լուրերն այն մասին, որ կալանավորվածների թվում անձամբ Նաոմի Օնին է: Բրիտանական մամուլում ժամանակ առ ժամանակ տեղեկություններ են հայտնվում, որոնց համաձայն՝ աղջիկն անձամբ է կազմակերպել իր վրա հարձակումը ու դիտավորյալ է ոստիկանությանը գցել մոլորության մեջ:
Տուժողն ինքը օրերս հայտարարել էր, որ «սարսափելի վշտացած է» նման կասկածներից: Աղջիկը մտավախություն ունի, որ այդ կասկածների պատճառով իսկական չարագործները կխուսափեն պատժից:
Սքոթլանդ-Յարդն իր հերթին ընդգծում է, որ ներկայում քննությունը շարժվում է բոլորովին այլ ուղղությամբ: Այդուհանդերձ, իրավապահներին կասկածելի է թվում այն հանգամանքը, որ հարձակումից որոշ ժամանակ առաջ աղջիկն այցելել է ծծմբական թթվի զոհ դարձած մարդկանց մասին պատմող կայքեր: