Պապի գահը լքող Հռոմեա-կաթոլիկական եկեղեցու առաջնորդ Բենեդիկտոս XVI-ն այսօր վերջին անգամ է իր աշխատանքային կաբինետի պատուհանից ավանդական կիրակնօրյա Angelus քարոզով դիմել հազարավոր հավատացյալներին, որոնք հեղեղել էին Վատիկանի Սուրբ Պետրոսի հրապարակը: Այս մասին հայտնում է RIA Novosti-ն:
Հռոմի պապ Բենեդիկտոս XVI-ի վերջին ելույթը լսելու համար Հռոմում է եղել ավելի քան 200 հազար ուխտավոր և զբոսաշրջիկ: Այդ առիթով Իտալիայի մայրաքաղաքի իշխանությունները ձեռնարկել էին անվտանգության խիստ միջոցառումներ, որոնք կգործադրվեն նաև փետրվարի 27-ին, երբ հովվապետն անցկացնի իր հրաժեշտի վերջին համընդհանուր արարողությունը:
«Աստված ինձ կոչ է արել «լեռը բարձրանալ»՝ նվիրելու ինձ աղոթքներին և խորհրդածություններին, սակայն դա չի նշանակում, որ ես լքում եմ եկեղեցին: Հակառակը, եթե Աստված խնդրել է ինձ դա, ապա միայն այն բանի համար, որ ես նույն նվիրվածությամբ ու սիրով շարունակեմ ծառայել նրան, ինչպես արել եմ մինչ օրս, սակայն իմ տարիքին և ուժերին ավելի համապատասխան կերպով»,-ասել է Հռոմի պապը:
Գահը լքելու մասին 85-ամյա պապը հայտարարել էր փետրվարի 11-ին՝ որոշումը պատճառաբանելով իր պատկառելի տարիքով:
«Թափուր գահի» մասին կհայտարարվի փետրվարի 28-ին՝ Երևանի ժամանակով ժամը 23:00-ին: Դրանից մի քանի ժամ անց Պապն ուղղաթիռով կուղևորվի հարավային Կաստել Գանդոլֆո քաղաքի իր ամառային նստավայր: Նոր պապին կընտրեն մարտի առաջին կեսին: