«Առաջին լրատվական»-ի զրուցակիցն է ԲՀԿ պատգամավոր Էլինար Վարդանյանը
– Տիկին Վարդանյան, ՀՀ գլխավոր դատախազ Գևորգ Կոստանյանը հաշվետվություն ներկայացնելու ժամանակ հայտարարեց, որ դատախազությունն ամեն ինչ անում է, որ Հայաստանում արդարություն հաստատվի: Իսկապե՞ս Գլխավոր դատախազությունը արդարություն հաստատելու համար բավարար ջանքեր է գործադրում:
– Հարց է առաջանում, որ եթե դատախազությունը գործադրում է բոլոր հնարավոր ջանքերը, որպեսզի Հայաստանում արդարություն հաստատվի, այդ դեպքում ինչո՞ւ չի հաստատվում արդարություն: Ինչո՞ւ յուրաքանչյուր քաղաքացի իր կյանքում չի նկատում այդ արդարության գերակայությունը: Միայն հայտարարություններով չէ, որ պետք է զգացվի արդարության կամ արդարադատության գերակայությունը: Հետևաբար այստեղ ես կկիսեմ բազմաթիվ քաղաքացիների կարծիքը, որ թերևս այդ ջանքերը բավարար չեն կամ միայն ջանքեր գործադրելը բավարար չէ, որ արդարության գերակայություն լինի:
– Եթե միայն ջանքերը բավարար չեն, ուրիշ էլ ի՞նչ է անհրաժեշտ Ձեր կարծիքով:
– Պետք է ունենանք արդյունքներ: Այն, որ այս կամ այն կառույցը միայն ջանքեր գործադրի, բայց արդյունքները տեսանելի չլինեն, արդեն վկայում է այն մասին, որ ինչ-որ բան այնպես չի արվում: Այստեղ ասել, որ արվել է հնարավորինս, որ արդարություն հաստատվի, այնքան էլ տեղին չէ, այնքան էլ իրականությանը չի համապատասխանում: Ավելին՝ մի քանի օր առաջ մեր հանձնաժողովում, ըստ ոլորտների, քննարկվում էր մարդու իրավունքների պաշտպանի զեկույցը, և դատախազությունը մեր կողմից հրավիրված այն եզակի մարմինն էր, որը հրաժարվեց մասնակցել և քննարկել այն խնդիրները, որ բարձրացվել են մարդու իրավունքների պաշտպանի կողմից: Իսկ այդպիսի խնդիրները զեկույցում բազմաթիվ են: Արդյոք արդարությանն ուղղված ջանքնե՞րն են, որ անտեսել են տալիս այն խնդիրները, որոնք բարձրացվել են, իմ գնահատմամբ, շատ կարևոր զեկույցում:
– Ձեր կարծիքով՝ ինչո՞ւ դատախազությունը հրաժարվեց մասնակցել այդ քննարկմանը:
– Ես այդ հարցը փորձելու եմ ինքս ճշտել հենց դատախազության հետ: Իրենք պատճառաբանեցին աշխատանքային զբաղվածությամբ:
Հարցազրույցն ամբողջությամբ՝ մեր տեսանյութում:
