Մինչ ողջ ժողովուրդը տագնապած սպասում է էլեկտրաէներգիայի սակագնի բարձրացման վերաբերյալ թեժ քննարկումների ընթացքին ու դրանից բխող հետևանքներին, վարչապետ Հովիկ Աբրահամյանը կառավարության բարձր ամբիոնից այսօր ավետեց ԱՎԾ հուսադրող թվանկարչության մասին: Վարչապետը, ում ուշքն ու միտքը, վարչական ամբողջ ռեսուրսը այս պահին ուղղված է որդուն Արտաշատում քաղաքապետ դարձնելուն, նիստում անդրադառնալով երկրի տնտեսության ներկա վիճակին՝ նշեց, որ ԱՎԾ երեկվա հրապարակած տվյալներով առկա է տնտեսական ակտիվություն:
Չգիտես ինչու, այս ավետիսը, հանդարտեցնելու փոխարեն, մի տեսակ ալեկոծել էր վարչապետի ներաշխարհը, ինչը արտահայտվեց իր կարողությունները կասկածի տակ դնողների ուղղությամբ հոխորտանքով. «Եթե որոշ մարդիկ ենթադրությամբ են խոսում, ապա մենք թվերով ու հաշվարկներով ենք հիմնավորում, որ տնտեսական աճ ունենալու ենք: Համոզված եմ, որ չորս ամսվա տվյալով լինելու է 2.2-2.3 տոկոս աճ»:
Ամենակարող Հովիկ Աբրահամյանը, որի նշանակվելուց մինչ օրս թե՛ փոքր ու մեծ գործարարները, թե՛ շարքային քաղաքացիները միայն տնտեսական անկմանն ու սոցիալական կյանքի վատթարացմանն են ականատես լինում, առաջարկում է վերջ դնել այն խոսակցությանը, թե տնտեսական անկում է լինելու, և հավաստիացնում է, թե որոշ քաղաքական գործիչների և քաղաքական ուժերի այն ցանկությունը, թե կառավարությունը կձախողվի, ու տնտեսական անկում կարձանագրվի, չի իրականանալու: Ավելին՝ արձանագրվելու է նվազագույնը 2-3 տոկոս տնտեսական աճ, ինչն ակնհայտ կլինի երկրորդ կիսամյակից:
Վարչապետի խոսքով՝ եթե այն ծրագրերը, որ պլանավորել են, այս տարի իրականացվեն, ապա կառավարությունը կփորձի բյուջեում դրված 4.1 տոկոս տնտեսական աճը միասնական ուժերով ապահովել: «Հասկանալի է, որ կան նաև տարածաշրջանային խնդիրներ, բայց դրանք պատճառ չպետք է դառնան, որ մենք չփորձենք անել առավելագույնը, որպեսզի տնտեսական աճ արձանագրվի մեր երկրում: Սա է մեր մոտեցումը»,- եզրափակեց Հովիկ Աբրահամյանը:
Թե ինչի վրա է հիմնված վարչապետի լավատեսությունը և 4.1 տոկոս աճը ապահովելու վստահությունը՝ նիստից հետո մի քանի լրագրողի հետ ճեպազրույցում փորձեց մեկնաբանել էկոնոմիկայի նախարար Կարեն Ճշմարիտյանը:
«Առաջին լրատվական»-ը նախարարից հետաքրքրվեց, թե էլեկտրաէներգիայի սակագնի 15-17 դրամով բարձրացումը ի՞նչ հետևանքներ կունենա սոցիալական, տնտեսական կյանքի վրա:
