«Ֆրանս Պրեսս» գործակալությունը, հղում կատարելով Սիրիայի ընդդիմադիր և հեղափոխական ազգային կոալիցիայի ներկայացուցիչ Վալիդ Ալ-Բոննիին, հայտնել է, որ Սիրիայի ընդդիմությունը հայտարարել է Բաշար Ասադի կողմնակիցներից ազատագրված տարածքներում կառավարություն ձևավորելու իրենց մտադրության մասին:
«Մենք պայմանավորվել ենք ձևավորել կառավարություն` ազատագրված տարածքների ղեկավարումն իրականացնելու համար»,- Եգիպտոսի մայրաքաղաք Կահիրեում ընդդիմադիր կոալիցիայի հանդիպումից հետո հայտարարել է Բոննին: Ըստ նրա՝ կոալիցիայի՝ Ստամբուլում մարտի 2-ին կայանալիք հանդիպման ժամանակ կպարզվի վարչապետի և կառավարության մյուս անդամների թեկնածությունները:
2011 թ. մարտից Սիրիայում չեն դադարում իշխանության և ընդդիմության բախումները: ՄԱԿ-ի տվյալներով՝ այս ընթացքում ավելի քան 70 հազար մարդ զոհվել է:
