Երևանի քաղաքապետարանում տեղի ունեցած աշխատանքային հերթական խորհրդակցության ժամանակ անդրադառնալով թափառող կենդանիների ուղղությամբ տարվող աշխատանքներին՝ քաղաքապետ Տարոն Մարգարյանը հանձնարարել է ուսումնասիրել միջազգային փորձն ու շահագրգիռ հասարակական կազմակերպությունների դիտարկումները և ներկայացնել առաջարկների ընդհանուր փաթեթ:
«Երևան քաղաքում թափառող կենդանիների խնդիրը շարունակում է մնալ օրակարգում: Ինչպես կենդանասերների, այնպես էլ քաղաքապետարանի հետաքրքրության շրջանակում է այս հարցին շուտափույթ և վերջնական լուծում տալը: Միջազգային պրակտիկան ցույց է տալիս, որ այս խնդրի արդյունավետ լուծման համար անհրաժեշտ է ծավալուն մոտեցում՝ սկսած օրենսդրական կարգավորումներից մինչև հասարակության շրջանում համապատասխան մշակույթի ձևավորում: Ուստի համագործակցությունը պետք է լինի բոլոր շահագրգիռ կողմերի, ինչպես նաև ոլորտի խնդիրներով հետաքրքրված միջազգային և տեղական կազմակերպությունների միջև: Թափառող շների զանգվածային ստերջացման ծրագիրը, ինչպես նաև մեծ քանակությամբ կացարանների կառուցումը, պահանջում է զգալի ֆինանսական ներդրումներ, ինչը հնարավոր չէ իրականացնել քաղաքային բյուջեի շրջանակում:
Ընդ որում, պետք է հաշվի առնել մայրաքաղաքի օրակարգային այլ խնդիրները, որոնք հրատապ միջոցներ և լուծումներ են ակնկալում: Բացի այդ, միջազգային պրակտիկան ցույց է տալիս, որ միայն թափառող շների ստերջացմամբ հարցը չի կարող վերջնական լուծում ստանալ: Անհրաժեշտ է օրենսդրական մոտեցումներով կարգավորել նաև ընտանի կենդանիների խնամքի, բազմացման, նաև կենդանիների առևտրի ոլորտը: Բացի այդ, մայրաքաղաքում անհրաժեշտ է ընտանի կենդանիների զբոսանքի համար համապատասխան վայրեր ստեղծել, ինչը ևս մեծ ներդրումներ և բազմակողմանի լուծում պահանջող խնդիր է:
Հետևաբար, այս ուղղությամբ հանդես բերեք նախաձեռնողականություն և փորձեք ներգրավել միջազգային ներդրումներ՝ խնդրի հնարավոր լուծման նպատակով»,- ընդգծել է քաղաքապետ Տարոն Մարգարյանը:
