Գորիսի «Սդղի գյոլ» կոչվող տարածքում Սյունիքի մարզպետ Սուրիկ Խաչատրյանի որդու՝ Տիգրան Խաչատրյանի մասնակցությամբ դեպքի շարժառիթը, նախնական վարկածով, եղել է կենցաղային: «Փաստինֆո»–ի փոխանցմամբ՝ այդ մասին այսօր ՀՀ քննչական կոմիտի և ԵԱՀԿ-ի աջակցությամբ Ծաղկաձորում կազմակերպված երկօրյա սեմինարի շրջանակներում լրագրողների հարցին ի պատասխան ասել է ՀՀ քննչական կոմիտեի նախագահ Աղվան Հովսեփյանը:
Նշենք, որ Սուրիկ Խաչատրյանի որդին այսօր ինքնակամ է ներկայացել իրավապահներին:
Նա նշեց, որ նախնական տվյալներով միջադեպին ներգրավված է եղել մոտ 10 մարդ, սակայն նրանցից յուրաքանչյուրի դերակատարության աստիճանը կորոշվի նախաքննության ընթացքում:
Լրագորղներից մեկի հարցին ի պատսախան, թե միջադեպից հետո աշխատանքից ազատվել է Գորիսի ոստիկանապետը, արդյոք Քննչական կոմիտեում պաշտոնանկություններ կլինե՞ն, Աղվան Հովսեփյանը պատասխանել է, որ տեղեկություն չունի՝ ինչու է աշխատանքից ազատվել Գորիսի ոստիկանապետը, չգիտի՝ որքանով է դա կապված միջադեպի հետ, սակայն եթե գործի քննության արդյունքում պարզվի, որ Սյունիքի մարզի քննչական ապարատի աշխատակիցները հանցագործություն են կատարել, նրանց վերաբերյալ գործը կուղարկեն ՀՀ Հատուկ քննչական ծառայություն, եթե պարզվի, որ կարգապահական խախտումներ են թույլ տվել, կենթարկվեն կարգապահական տույժերի, իսկ, եթե պարզվի, որ գերազանց կատարել են իրենց ծառայողական պարտականությունները, կխրախուսվեն:
