Այսօր կառավարության նիստում արդարադատության նախարար Հովհաննես Մանուկյանը ներկայացրեց նախագիծ, որով առաջարկում էր պետական բյուջեից 160 հազար եվրո գումար տրամադրել նախարարությանը: 160 հազար եվրոն փոխհատուցում է տրամադրվելու ՀՀ-ում կայացված այն վճիռների համար, որոնք Մարդու իրավունքների եվրոպական դատարանը սխալ է ճանաչել:
Կառավարության նիստում արդարադատության նախարար Հովհաննես Մանուկյանը նշեց, որ բյուջեից փոխհատուցման տրամադրումն ուշացել է, քանի որ այս գործերով փոխհատուցման վերջնաժամկետը մայիսի 13-ն էր, հետևաբար կառավարությունը տույժեր ու տուգանքներ ևս կվճարի: Ըստ նախարարի՝ բոլոր գործերով ընդհանուր առմամբ առավելագույնը 150 հազար եվրո տուգանք կվճարվի:
2010 թ. հունվարից մինչև այս տարվա մայիսի 1-ը, Հովհաննես Մանուկյանի խոսքով, ՄԻԵԴ-ը Հայաստանի վերաբերյալ 31 վճիռ է կայացրել, որոնցով բյուջեից փոխհատուցվել է մոտ 555,000 եվրոյին համարժեք դրամ: Դրանց թվում կան վճիռներ, որոնք կայացվել են արդարադատության նախարար Հովհաննես Մանուկյանի՝ Վճռաբեկ դատարանի նախագահ լինելու ժամանակ: Արդյոք նախարարը պատասխանատվության իր բաժինը չունի՞ իր օրոք կայացված վճիռների համար, ովքե՞ր են պատասխանատուները, և ի՞նչ քայլեր պետք է նախաձեռնեն այս խնդրի դեմ: Կառավարության նիստից հետո լրագրողների հետ ճեպազրույցում այս հարցերին անդրադարձել է Հովհաննես Մանուկյանը:
Ավելին՝ մեր տեսանյութում:
