ԱՄՆ-ը Եվրոպային մեղադրում է աշխարհում պարենային անվտանգությունը խաթարելու փորձերի մեջ, քանի որ ԵՄ-ն առաջարկում է նոր կանոններ, որոնք 28 անդամ երկրներից յուրաքանչյուրին թույլ կտան հրաժարվել Բրյուսելի որոշումից՝ «ճանապարհ բացել» գենետիկորեն մոդիֆիկացված կուլտուրաների աճեցման համար:
Financial Times-ին տված հարցազրույցում ԱՄՆ գյուղատնտեսության նախարար Թոմ Վիլսակը նշել է, որ նման քայլը «լուրջ անհանգստություն» է հարուցել տրանսատլանտյան առևտրի հարցով ապագա բանակցություններում:
«Եթե մենք լրջորեն ենք խոսում գլոբալ պարենային անվտանգության մասին, ապա մենք պետք է լրջորեն վերաբերվենք գիտությանը, որը մեզ թույլ է տալիս լինել առավելագույնս արդյունավետ»,- հայտարարել է Վիլսակը G20-ում գյուղատնտեսության նախարարների հետ հանդիպման նախօրեին, որի ժամանակ նրանք քննարկելու են աշխարհում պարենային անվտանգության բարելավման հարցերը:
«Եվրամիության որոշումը փաստացի ստեղծում է լուրջ խոչընդոտ ամբողջ աշխարհում պարենային անվտանգության խնդրի լուծման համար»,- ասել է նա FT-ի հետ զրույցում:
Աշխարհը հաջողությունների է հասել այնպիսի խնդիրների լուծման գործում, ինչպիսին է անբավարար սնվելն ու պարենային անվտանգությունը՝ նշել է նա:
Այդուհանդերձ, աշխարհում 850 մլն մարդ մինչ օրս մատնված են սովի, իսկ համաշխարհային բնակչության թվի աճը սպառնում է կլիմայական բացասական հետևանքներով:
Այդ խնդիրներին պատասխան կարող է լինել գյուղատնտեսության արտադրանքի արդյունավետության աճի ապահովումը տեխնոլոգիական ինովացիաների օգնությամբ՝ նշել է Վիլսակը:
Եվրոպայում պատմականորեն ձևավորված է հոռետեսական վերաբերմունք ԳՄՕ-ների նկատմամբ ավելի, քան ԱՄՆ-ում, ինչը զգալիորեն զսպում էր նման մթերքի առևտուրը:
Անցած ամիս Եվրահանձնաժողովը առաջարկեց ԵՄ յուրաքանչյուր երկրի որոշում կայացնել՝ իր տարածքում թույլատրե՞լ, թե՞ արգելել գենետիկորեն մոդիֆիկացված կուլտուրաների նոր տեսակի աճեցումը:
