Հավաքական անվտանգության պայմանագրի կազմակերպությունը լուրջ մտահոգություն է հայտնում Լիբիայի զարգացումների կապակցությամբ: Այս մասին հայտարարել է ՀԱՊԿ-ի գլխավոր քարտուղար Նիկոլայ Բորդյուժան: «Հավաքական անվտանգության պայմանագրի կազմակերպությունը լուրջ մտահոգություն է հայտնում Լիբիայում իրադարձությունների զարգացման կապակցությամբ, որոնք հանգեցնում են ռազմական գործողությունների շարունակմանը և բազմաթիվ զոհերի, հակամարտության խաղաղ կարգավորման ջանքերում առաջընթացի բացակայությանը»,- նշել է նա: Այս մասին հաղորդում է RBC-ն:
Բորդյուժան նաև ասել է, որ այս հակամարտության կարգավորման քայլերը պետք է իրականացվեն միջազգային իրավունքին խիստ համապատասխան և չպետք է հակասեն ՄԱԿ-ի Անվտանգության խորհրդի թիվ 1970 և 1973 բանաձևերին: «Մենք հանդես ենք գալիս բոլոր ռազմական գործողությունների և բռնարարքների դադարեցման, խաղաղ բնակչության և քաղաքացիական օբյեկտների դեմ ռազմական ուժի ցանկացած կիրառման, Լիբիայում կարգավորման քաղաքական հուն տեղափոխելու օգտին, ինչը կհապատասխանի Լիբիայի ժողովրդի և, ընդհանրապես, ողջ տարածաշրջանի շահերին: Մենք պատրաստ ենք աջակցել այդ երկրում խաղաղություն և կայունություն հաստատելուն»,- եզրափակել է նա:
