«Առաջին լրատվական»-ի և A1plus-ի զրուցակիցն է «Բարգավաճ Հայաստան» խմբակցության պատգամավոր Ստեփան Մարգարյանը:
– Պարոն Մարգարյան, «Բարգավաճ Հայաստան» կուսակցությունը կարծես թե այլևս իշխանափոխության համար չի պայքարում:
– Ես կարծում եմ, որ Հայաստանում, իշխող կուսակցությունից բացի, չկա որևէ այլ կուսակցություն, ով իշխանափոխություն չցանկանա: Եվ վստահ եմ, որ ԲՀԿ-ն այս դեպքում բացառություն չէ: Այնպես որ, եթե խոսքը քաղաքական դաշտի իրավիճակի տարբերության մասին է՝ մինչև փետրվարյան դեպքերն ու այս շրջանի միջև եղած տարբերության, այո, անշուշտ, կան այդ դեպքերը: Բնականաբար քաղաքական դաշտը լուրջ ցնցումներ ապրեց, ԲՀԿ-ն՝ նույնպես: Եվ ժամանակ է պետք, որպեսզի վերադառնա ինչ-որ մի այլ վիճակի:
– Բայց արդեն երեք ամիս է անցել, դեռ չե՞ք կողմնորոշվել: ԲՀԿ-ն իրեն ընդդիմություն հայտարարեց, բայց կարծես այլընտրանքային ԲՀԿ-ն ավելի ընդդիմադիր էր, քան ընդդիմադիր ԲՀԿ-ն:
– ԲՀԿ-ն հիմա, իհարկե, ավելի թույլ է, քան այն ժամանակ: Դա ընդունելի տարբերակ է, բայց փոփոխություն կկայանա այն ժամանակ, երբ ԲՀԿ-ն իր ներսում համարի, որ այլևս չի լինելու նման ընդդիմություն: Այդպիսի մոտեցում չկա, որ ինքը պետք է լինի ավելի թույլ ընդդիմություն կամ չլինի ընդդիմություն: Կարևորը քո մոտեցումն է, թե ուր ես ձգտում և ինչպիսին ես ուզում լինել:
– Ինչպիսի՞ն է ԲՀԿ-ն ուզում լինել:
– Ուզում է լինել ընդդիմություն, վերադարձնել նախկին դիրքերը: Դրա համար, բնականաբար, ժամանակ է պետք: Թե ինչքա՞ն կհաջողվի այդ ցնցումներից հետո… Անշուշտ, մեծ բան փոխվեց:
– Եթե ՀԱԿ-ը որոշի շարժում ծավալել մինչև ընտրությունները, այսինքն՝ արտահերթ ընտրությունների գնալ, կմիանա՞ք նրանց:
– Եթեներով ոչ մի բան չի լինում: Մենք պատրաստ ենք ցանկացած հարց քննարկել: Այնպես չի եղել, որ որևէ մեկը մի բան առաջարկի, մենք չքննարկենք: Մենք պատրաստ ենք քննարկել ցանկացած գաղափար ու առաջարկություն: Այս խոսակցությունը ճիշտ կլիներ այն ժամանակ, եթե մենք հայտարարեինք, որ այլևս նման հարցեր չենք քննարկում: Իսկ ես առաջին անգամ եմ լսում, որ նման հարց գոյություն ունի:
– Այսինքն՝ Դուք շարունակո՞ւմ եք հիմա քննարկել իշխանափոխության թեման:
– Մենք ցնցումներից հետո շարունակում ենք մեր կայացման գործընթացը, մենք հիմա գնում ենք այդ ճանապարհով: Որևէ մեկին չենք ասել, որ իրենց առաջարկները չենք քննարկելու: Ընդհակառակը, մենք քննարկում ենք, թե ինչ պետք է անենք, որ վերականգնենք մեր նախկին վիճակը: Հիմա մեզ մոտ այդ քննարկումներն են, այլ հարցեր չկան:
– Այսինքն՝ կարո՞ղ է մինչև հերթական ընտրությունները չհասցնեք վերականգնել ձեր նախկին վիճակը:
– Կարծում եմ՝ ոչ, չգիտեմ, որևէ բան հնարավոր չէ ասել:
– Ինչքա՞ն ժամանակ է հարկավոր դրա համար:
– Դա գործընթաց է:
– ԲՀԿ-ից Գագիկ Ծառուկյանի դուրս գալուց հետո շա՞տ է ընկել կուսակցության վարկանիշը:
– Ես կարծում եմ՝ դուք ավելի լավ կասեք: Վարկանիշը չի ընկել, ես չեմ կարծում, որ հասարակության մեջ որևէ մեկը մեղադրում է ինձ կամ մեկ ուրիշին:
– Հասարակությունը հստակ ասում է, որ Դուք իշխանափոխություն չեք անում:
– Ես չեմ զգում, որ հասարակությունն այդպիսի բան է ասում: Հասարակությունն ասում է՝ ափսոս, որ չարեցիք: Մենք գալիս էինք ձեզ հետ, իսկ դուք փետրվարի 20-ի հանրահավաքը չարեցիք: Դա ասում են, բայց որ հասարակությունն ասի՝ մենք այլևս ձեզ հետ չենք գա, կարծում եմ՝ նման բան չկա: Համենայնդեպս, վերաբերմունքն այդպիսին չէ:
– Հասարակությունը ոչ այնքան ԲՀԿ-ի, որքան Գ. Ծառուկյանի հետևից էր գնում: «Բարգավաճ Հայաստան» կուսակցություն ասելով՝ կարծես Գ. Ծառուկյան է հասկանում:
– Գ. Ծառուկյանը, անշուշտ, ԲՀԿ-ում ուներ շատ մեծ դերակատարություն:
– Գործող կառավարության ձևավորումից մեկ տարի է անցել: Ինչպե՞ս եք գնահատում նրա գործունեությունը:
– Այս և նախկին կառավարությունների միջև ես տեսնում եմ հստակ տարբերություն: Նախկին կառավարությունը, բացի այն հարցերից, ինչն ինքն էր ուզում, այլ բան հակված չէր քննարկել: Կային դեպքեր, երբ ասում էին՝ ճիշտ եք ասում, բայց, միևնույն է, չենք անելու: Այս կառավարությունը գոնե քննարկում է: Այս կառավարության օրոք մեզ հաջողվել է մի քանի կարևոր օրենքներ, փոփոխություններ անցկացնել: Այս կառավարությունը մշտապես ասում է՝ եկեք քննարկենք: Եվ եթե դիմել ենք քննարկելու համար, ապա քննարկումը կայացել է: Համենայնդեպս, այս կառավարությունը կարծես թե ավելի բաց է: Ցանկությունների տեսակետից կարծես թե հասկանում են իրավիճակի լրջությունը, բայց ես չեմ տեսնում լուրջ արդյունքներ: Եթե ասեմ, թե ՀՀ քաղաքացու կյանքում ինչ-որ որակական բան է փոխվել, ապա դա այդպես չէ:
– ԲՀԿ-ն ե՞րբ կպահանջի վարչապետ Հովիկ Աբրահամյանի հրաժարականն այնպես, ինչպես պահանջում էր Տիգրան Սարգսյանինը:
– Որևէ բան ես չեմ կարող բացառել:
– Հ. Աբրահամյանի նկատմամբ համեմատաբար դրական վերաբերմունքը պայմանավորվա՞ծ է այն հանգամանքով, որ նա համարվում է ԲՀԿ-ի ստվերային ղեկավարը:
– Ես չեմ կարծում, որ մենք պետք է բամբասանքային խոսակցություններին պատասխանենք: Ես չգիտեմ, թե այդ կարծիքը որտեղ կա, և ինչում է այն դրսևորված:
