ԵԱՀԿ Մինսկի խմբի համանախագահները երեկ հայտարարություն են տարածել Փարիզում Հայաստանի ու Ադրբեջանի արտաքին գործերի նախարարների հետ հանդիպումների, ինչպես նաև այդ շրջանակում երկու երկրների նախագահների մակարդակով հանդիպում կազմակերպելու հարցի քննարկման մասին: Սրանից զատ, համանախագահները անդրադարձել են նաև մայիսի 3-ին ԼՂՀ ում տեղի ունենալիք խորհրդարանական ընտրություններին: Նրանք հայտարարել են, որ Ղարաբաղի ժողովուրդն, իհարկե, ունի իր ապագան որոշելու իրավունք, բայց ընտրությունները չեն ճանաչվում և չեն կարող ազդել ԼՂՀ կարգավիճակի որոշման վրա: Համանախագահները նշում են, որ չեն ճանաչում ԼՂՀ անկախությունը և հետևաբար նաև անցկացվող ընտրությունների արդյունքները:
Թե ինչքանով են կապված Սարգսյան-Ալիև նոր հանդիպման կազմակերպման ջանքերն ու ղարաբաղյան ընտրությունները չճանաչելու մասին հայտարարությունները, դժվար է ասել, սակայն ակնհայտ է, որ Ադրբեջանը բանակցային գործընթացում կարծր դիրքորոշում ունի, և սրա մասին է վկայում նաև այն, որ Փարիզի հանդիպումներից հետո ամերիկացի համանախագահ Ջեյմս Ուորլիքը հայտարարել էր, որ Հայաստանը բաց է բանակցությունների համար: Նա հայտարարել էր նաև, որ հունիսին Բաքվում կայանալիք Եվրոպական օլիմպիական խաղերին Հայաստանի մասնակցությունը կօգնի բանակցային կառուցողական ջանքերին:
Ասել է թե` համանախագահները փորձում են Ալիևին բերել բանակցային սեղան և այդ պատճառով ժեստեր են անում Ադրբեջանի ուղղությամբ: Եվ սա ակնհայտ է: Այսինքն` Բաքուն երևի թե հրաժարվում է նախագահների մակարդակով հանդիպումից: Ինչն է պատճառը, դժվար է ասել, բայց կա՛մ Բաքուն խուսափում է, այսպես ասած, առերեսումից և հրադադարի խախտման համար պատասխան տալուց, կա՛մ Ալիևը իրեն թույլ է տալիս նման դիրքորոշում ցուցաբերել և ապավինել հրադադարի խախտման մարտավարությանն ու բանակցային պարտավորություններ չստանձնել:
Թե որտեղ և երբ են համանախագահները պլանավորում անցկացնել նախագահական հանդիպումը` պարզ չէ: Օրինակ` մայիսի 9-ին և՛ Սարգսյանը, և՛ Ալիևը կլինեն Մոսկվայում շքերթի: Կա՞ նրանց հանդիպում կազմակերպելու պլան, թե՞ ոչ` ցույց կտա ժամանակը: Մոսկվան հաստատ դեմ չի լինի, որպեսզի օգտագործի նաև բանակցային գործընթացում սեփական կշիռը և այսպես ասած` կուրատորությունը ցուցադրի: Սակայն դատելով համանախագահների հայտարարությունից` մոսկովյան հանդիպման պարզապես կարող են և չհասցնել: Եթե, իհարկե, Ռուսաստանն Ալիևի հետ սեպարատ համաձայնության չգան ու անակնկալ չմատուցեն և՛ ամերիկյան ու ֆրանսիական կողմերին, և՛ Հայաստանին, ու կազմակերպեն Սարգսյան-Ալիև հանդիպում Մոսկվայում:
Չի բացառվում, որ Ալիևը դրա համար էլ հրաժարվում է համանախագահների ընդհանուր առաջարկից: Իսկ որ Սարգսյանը միանշանակ պատրաստ է Մոսկվայի ցուցումով Ալիևի հետ ցանկացած հանդիպման, ակնհայտ դարձավ Սերժ Սարգսյանի պոզներյան հարցազրույցից:
