Բրիտանացի գիտնականները հետաքրքիր օրինաչափություն են նկատել. յուրաքանչյուր երրորդ կին դիետայի ընթացքում ավելորդ կիլոգրամներից ձերբազատվելու փոխարեն՝ մոտ երկու կիլոգրամ քաշ է հավաքում: Այսինքն՝ ստացվում է լրիվ հակառակ արդյունք՝ հայտնում է zhenskoe-mnenie.ru-ն:
Բրիտանացի գիտնականների աշխատանքը հետագայում զարգացել է Ամերիկայում, որտեղ դիետոլոգները կատարել են նմանատիպ հետազոտություն և պարզել, որ կանայք առաջին անգամ դիետա են պահում միջինը 15-20 տարեկանում, հետո դրան պարբերաբար հետևում են տարեկան 3 կամ ավելի անգամ:
Ամերիկացիներին հաջողվել է պարզել քաշի ավելացման պատճառը: Դիետաների մեծ մասը հիմնված է խիստ կանոնների պահպանման վրա: Արդյունքում օրգանիզմը սկսում է ճարպ տնտեսել, «պահեստավորել» այն կամ դրանով լրացնել սպիտակուցների, ճարպերի, ածխաջրերի պակասը: Բացի դրանից՝ ամեն կնոջ չէ, որ հաջողվում է դիետան բարեհաջող ավարտել:
Եվս մեկ խնդիր կա: Դիետաները ենթադրում են որոշակի սննդամթերքների օգտագործում, որոնք կարող են դուր չգալ մարդուն: Չսիրած ուտելիքների պատճառով արտադրվում են սթրեսի հորմոններ, ինչն իր հերթին մեծացնում է ախորժակը: Դիետա պահելիս պետք չէ հրաժարվել սիրելի ուտելիքներից՝ ասում են փորձագետները, բայց դրանք պետք է օգտագործել շատ ավելի քիչ քանակությամբ, հատկապես եթե հաշվի առնենք, որ շատ կանանց սիրելի ուտելիքների թվում են պանիրը, հացը, շոկոլադը:
