Նոր Նորքի 7-րդ զանգվածի 2/27 ընտրատեղամասում 1822 ընտրողից 8:50-ի դրությամբ քվեարկության մասնակցել էր 40 հոգի: Հանձաժողովի նախագահ Ռուզաննա Սիմոնյանը սա պայմանավորում է վատ եղանակով: Նա նշեց, որ մասնակիցների թվի վերաբերյալ իրենք տվյալներ պետք է հաղորդեն երկու ժամը մեկ: Նա նշեց, որ այս պահի դրությամբ որևէ միջադեպ չի գրանցվել, ամեն ինչ բնականոն ընթացքի մեջ է:
Հարցին՝ մարդիկ, ովքեր ՀՀ-ում չեն , բայց դարձյալ կան ցուցակներում, Ռուզաննա Սիմոնյանը պատասխանեց, որ քանի որ այդ մարդիկ գրանցումից դուրս չեն եկել, հնարավոր է, որ այսօր գան ընտրության:
Հիշեցնենք, որ Հայաստանի նախագահի պաշտոնին հավականում է 7 թեկնածու. ՀՀԿ առաջնորդ, Հայաստանի գործող նախագահ Սերժ Սարգսյանը, «Ժառանգություն» կուսակցության ղեկավար Րաֆֆի Հովհաննիսյանը, «Ազատություն» կուսակցության առաջնորդ, նախկին վարչապետ Հրանտ Բագրատյանը, «Ազգային ինքնորոշում միավորում» կուսակցության նախագահ Պարույր Հայրիկյանը, «Ռադիո հայ» ընկերության խորհրդի նախագահ, քաղաքագետ Անդրիաս Ղուկասյանը, ԼՂՀ նախկին ԱԳ նախարար Արման Մելիքյանը, և էպոսագետ Վարդան Սեդրակյանը:
Այս ընտրությունները Հայաստանի նորանկախ պատմության ընթացքում 6-րդ նախագահական ընտրություններ են: 1991 թվականին (Լևոն Տեր-Պետրոսյան), 1996 թվականին (Լևոն Տեր-Պետրոսյան), 1998 թվականին (Ռոբերտ Քոչարյան), 2003 թվական (Ռոբերտ Քոչարյան), 2008 թվական (Սերժ Սարգսյան):
