«Երեխայի դիրքը» ռումինական ֆիլմը, որի ռեժիսորն է Քելին Փիթեր Նաթցերը, արժանացել է 63-րդ Բեռլինյան կինոփառատոնի գլխավոր մրցանակին՝ «Ոսկե արջի»: Այս մասին հայտնում է ITAR-TASS-ը:
Ֆիլմի գլխավոր հերոսներն են 34-ամյա Բարբուն, որը ծեծելով սպանել էր մի դպրոցականի, և նրա մայր Կորնելիան: Որդուն սպառնում է 15 տարվա ազատազրկում, իսկ մայրը փորձում է կարևոր կապեր հաստատել, այցելում զոհվածի հարազատներին: Բարբուն նրա գործողություններում կեղծիք է նկատում, ատում նրա նախաձեռնությունն ու վերահսկողությունը:
Միջազգային ժյուրին՝ չինացի ռեժիսոր Վանգ Կար Վաեմի գլխավորությամբ, ընտրել է փառատոնի դափնեկիրներին:
Այս հեղինակավոր կինոստուգատեսի տարբեր անվանակարգերում «արծաթե արջեր» են ստացել իրանական, ամերիկյան, բոսնիական, կանադական և ղազախական ֆիլմերը:
Այս տարի Բեռլինյան ստուգատեսի քննադատները տեսել են կնոջ շատ ուժեղ դերեր, սակայն այդ անվանակարգում նախապատվությունը տվել են Պաուլինա Գարսիային՝ չիլիական «Գլորիա» մելոդրամայում, որի ռեժիսորը Սեբաստիան Լելիոն է:
«Լավագույն սցենար» անվանակարգում «Արծաթե արջի» է արժանացել իրանական «Փակ վարագույր» ֆիլմը: Ֆիլմի ստեղծմանը մասնակցել է Ջաֆար Փանահին, որին Իրանում մեղադրում են հակակառավարական գործունեության համար:
«Լավագույն դերասան» անվանակարգում հաղթող է ճանաչվել Նազիֆ Մուժիչը, որը նկարահանվել է բոսնիացի ռեժիսոր Դանիս Տանովիչի կիսավավերագրական «Դրվագ երկաթ հավաքողի կյանքից» գնչուական ընտանիքի մասին պատմող ֆիլմում:
Գեղարվեստական նվաճման համար մրցանակ է ստացել օպերատոր Ազիզ Ժամբակիևը՝ «Հարմոնիայի դասերը» ֆիլմի համար, որը նկարահանել է երիտասարդ ղազախ ռեժիսոր Էմիր Բայգազինը:
