Եվրոպան ձեռնոց է նետում ռուսական «Գազպրոմ» ընկերությանը՝ գրում է Foreign Policy-ն: Ավելի վաղ հաղորդվում էր, որ ԵՄ հակամենաշնորհային կարգավորողը պատրաստվում է «Գազպրոմ»-ին առաջադրել մրցակցության խախտման պաշտոնական մեղադրանք: Ընկերությունը կասկածվում է բնական գազի մատակարարման ոլորտում գերիշխող դիրքի չարաշահման մեջ: Հաղորդվում էր նաև, որ ռուսական ձեռնարկությանը մոտ աղբյուրը նշել է, որ «Գազպրոմ»-ը պատրաստ է կարգավորել այդ հարցը:
Foreign Policy-ն նշում է, որ եթե «Գազպրոմ»-ի դեմ իսկապես մեղադրանքներ առաջադրվեն, դա հերթական «շրջադարձը» կավելացնի Բրյուսելի և Մոսկվայի «փշոտ» հարաբերություններում: Այդպիսով, գրում է պարբերականը, ԵՄ-ն կխաղա իր «ամենաուժեղ մկաններով», և այդպիսի գործողությունների արդյունք կարող է լինել եվրոպական էներգետիկ ոլորտի «վերակազմավորումը» և Ռուսաստանի ու ԵՄ-ի միջև լարվածության հետագա սրումը:
Ամսագիրը նաև մեջբերում է փորձագետների խոսքերը, թե՝ «Գազպրոմը» դեռ կարող է հարցերի կարգավորման շուրջ պայմանավորվել Եվրահանձնաժողովի հետ և խուսափել տուգանքներից, պոտենցիալ հայցերից և հուսալի էներգամատակարարի համբավին «ավերիչ հարվածից»: Միաժամանակ, Foreign Policy-ն նշում է, որ «Գազպրոմը» «զուտ կորպորատիվ խաղացող» չէ, և ընկերության բիզնես-ռազմավարության վրա Մոսկվայի ազդեցությունն «անվիճելի է»: Վերջապես պարբերականը չի բացառում, որ «Գազպրոմ»-ի նկատմամբ Եվրահանձնաժողովի մոտեցումը կարող է բարդացնել Ասիայի վրա ընկերության վաղուց ծրագրված վերակողմնորոշումը:
