Հանդիսատեսն ու փորձագետները հիասթափված են, որ Բեռլինալե-2013-ին շատ քիչ համաշխարհային պրեմիերաներ էին ներկայացված: Նրանք դժգոհ էին նաև մրցակցային ծրագրին մասնակցող ֆիլմերի մակարդակից:
Կինոփառատոնի տնօրեն Դիտեր Կոսլիկը ստիպված է եղել շատ դիտողություններ լսել: Այս փառատոնի միակ դրական կողմն այն էր, որ շատ ֆիլմեր առանձնանում էին կանացի դերերի բարձր կատարողականությամբ, առաջին հերթին Ավստրիայի, Ֆրանսիայի, Չիլիի և Ռումինիայի ռեժիսորների աշխատանքներում:
Դրանից բացի, Կոսլիկին հաջողվել է համոզել իրանական իշխանություններին, և ներկայացվել է ռեժիսոր Ջաֆար Փանահի «Փակ վարագույր» ֆիլմը՝ դրանով իսկ քաղաքական շեշտեր հաղորդելով փառատոնին: Այս ֆիլմը Բեռլինալեի ֆավորիտներից մեկն է: Այն հավակնում է գլխավոր մրցանակներին, գրում է DW-ն:
Քննադատները առաջնություն են տալիս նաև չիլիացի ռեժիսոր Սեբաստյան Լելիոյի «Գլորիա» ֆիլմին, որի գլխավոր դերակատարը հանդիսատեսի սիրելի Պաուլինա Գարսիան է:
Բեռլինալեի ֆավորիտներից է նաև ավստրուհի Մելանի Լենցը, որը խաղում է «Դրախտ. Հույս» ֆիլմում: Տարվա հայտնությունը բելգիացի դերասանուհի 23-ամյա Պոլին Էտյեն է, որը «Միանձնուհին» ֆիլմի գլխավոր դերակատարն է:
Կինոքննադատները բարձր են գնահատում նաև ֆրանսիացի կինոաստղ Ժյուլյետ Բինոշի խաղը, որը փայլել է Բրյունո Դյումենի «Կամիլ Կլոդել, 1915» ֆիլմում:
Գերմանական արտադրության ֆիլմերի մեջ առանձնանում է Թոմաս Արսլանի «Ոսկի» ֆիլմը, որի գլխավոր դերակատարուհին Նինա Հոսն է:
Ավելացնենք, որ միջազգային կինոփառատոնի արդյունքները ժյուրին կհրապարակի շաբաթ երեկոյան:
