Վերջերս հրապարակվեց ԵԱՀԿ փաստահավաք դաշտային առաքելության զեկույցը, ինչպես նաև ԱՄՆ պետքարտուղարության հրապարակած մարդու իրավունքների ամենամյա զեկույցը, որն արտացոլում է իրավիճակն աշխարհում2010 թ., և ներկայացված է նաև Հայաստանի իրավիճակը:
«Առաջին լրատվականը» Հայ ազգային կոնգրեսի արտաքին հարաբերությունների հանձնաժողովի ներկայացուցիչ Վլադիմիր Կարապետյանին խնդրեց նախ գնահատել ԼՂ-ի վերաբերյալ ԵԱՀԿ զեկույցը:
Վլադիմիր Կարապետյանը նշեց. «ՀՀ իշխանությունները բազմիցս հայտարարել են, որ միջազգային հանրության դիրքորոշումները համընկնում են ՀՀ դիրքորոշումներին: Օրերս հրապարակվել է «ԼՂ հարակից, Ադրբեջանի օկուպացված տարածքներում իրավիճակի մասին» ԵԱՀԿ ՄԽ համանախագահների զեկույցը: ՀՀ ԱԳՆ պաշտոնական արձագանքում չկար ոչ մի խոսք այս վերնագրի մասին: Հիմա ի՞նչ կասեն` այդ վերնագիրն է՞լ է համընկնում ՀՀ իշխանությունների մոտեցումներին: Թե՞ զեկույցի այն դրույթը, ուր նշվում է ստատուս-քվոյի անընդունելի լինելու մասին, կամ «առանձնահատուկ դաժանությամբ» ներկայացվում են հայ բնակչության խայտառակ կենցաղային պայմանները:
Ու՞ր է այս մարդկանց արժանապատվությունը, ինչո՞ւ չեն խոսում, չեն հայտնում իրենց դիրքորոշումը այս խնդիրների վերաբերյալ: Ինչո՞ւ ձայն չի լսվում ԱԳՆ-ից` ի՞նչ է ,այնտեղ արդեն չկա՞ մեկը, որ պաշտպանի Հայաստանի Հանրապետությունը անարդար մեղադրանքներից»:
Անդրադառնալով պետդեպի զեկույցի` Հայաստանին առնչվող ձևակերպումներին` Վ.Կարապետյանը նկատեց.
«Պետքարտուղարության զեկույցի ձևակերպումներն էլ ե՞ն համապատասխանում ՀՀ իշխանությունների մոտեցումներին: Հապա ինչպե՞ս հասկանանք, որ արդեն չորս օր է անցել, բայց որևէ մեկը չի անդրադառնում այս զեկույցին, նույնիսկ՝ վերջին շրջանում որպես ՀՀ ԱԳՆ փաստացի փոխխոսնակ ներկայացող Է. Շարմազանովը, որը դիտավորյալ սուտ տեղեկություններ էր հայտնել Հայաստանի հանրությանը Եվրոպական խորհրդարանի ապրիլի 7-ին ընդունված բանաձևի վերաբերյալ և բացահայտվելուց հետո հանդես չեկավ որևէ բացատրությամբ»:
Վ. Կարապետյանը դիմեց իշխանություններին. «Բոլորդ համաձա՞յն եք, որ` «2008 թ., նշանակալի խախտումներով անցած ընտրություններից հետո, Սերժ Սարգսյանը` Հայաստանի հանրապետական կուսակցությունից (ՀՀԿ) ստանձնեց նախագահի պաշտոնը»: Ապա Վ. Կարապետյանը հարցրեց, թե իշխանությունները համաձա՞յն են նաև զեկույցի այս հատվածի հետ. «Խաղաղ ընտրությունների միջոցով իշխանությունը փոխելու քաղաքացիների իրավունքը սահմանափակվել է ընտրությունների անցկացման ընթացքում տեղ գտած կրկնվող, նշանակալի բացթողումների պատճառով, այդ թվում նաև հունվարին խորհրդարանական մեկ տեղի համար կայացած լրացուցիչ ընտրությունների ընթացքում»:
Ամփոփելով`Վլադիմիր Կարապետյանը հայտարարեց. «Այս ամենը ասվում է ձեր մասին, հարգարժան իշխանավորներ: Սա մեր՝ ՀԱԿ-ի գնահատականը չէ, այլ այն պետության, որի հետ դուք սերտ համագործակցում եք: Հիմա սա համապատասխանո՞ւմ է ձեր մոտեցումներին, այլապես պետք է ունենայիք մի փոքր արժանապատվություն ու համարձակություն` մի հոդաբաշխ մեկնաբանություն հնչեցնելու: Դուք չեք կարող ծպտուն հանել, որովհետև գիտեք, որ այն, ինչ ասվում է ձեր մասին, ճի՛շտ է, և ինչպես անցած տարի լռեցիք ու ծպտուն չհանեցիք, այնպես էլ այս չորս օրվա մեջ չեք կարող խելքի գալ ու մի պաշտոնական դիրքորոշում հայտնել: Ժողովուրդն էլ տեսնում է, որ դուք կարող եք մեծ-մեծ խոսել, հոխորտալ միայն երկրի ներսում, ուր պաշտպանված եք ոստիկաններով և ծախված դատավորներով, մինչդեռ երկրից դուրս վախեցած նապաստակից չեք տարբերվում: Դրա արդյունքում էլ հայտնվում են Հայաստանը հարվածող զեկույցներ…»: