Վրացական «Իմեդի» հեռուստաընկերությունը փետրվարի 15-ին աշխատանքից հեռացրել է երկու հաղորդավարի հոմոֆոբիական արտահայտությունների պատճառով, հաղորդում է «Գրուզիա Օնլայն»-ը:
Խոսքը առավոտյան եթերի հաղորդավար Սալոմե Գոգիաշվիլիի և Դավիդ Կացարավայի մասին է: Հեռուստաընկերության ղեկավարությանը դուր չեն եկել հունվարի 18-ի եթերի ժամանակ նրանց արած արտահայտությունները: Հեռուստահաղորդավարները Էլթոն Ջոնի և նրա ամուսնու մասին սյուժեից հետո, որտեղ ասվել է, որ փոխնակ մայրը զույգի համար երեխա է ունեցել, հայտարարել են, որ շատ են խղճում նրանց երեխային:
Հեռուստաընկերության էթիկայի խորհուրդը որոշել է, որ հաղորդավարների արտահայտությունները կրել են հոմոֆոբիայի բնույթ:
Գոգիաշվիլին և Կացարավան հայտարարել են, որ վիրավորական չեն համարում իրենց ասածը: Նրանք նշել են, որ արտահայտել են միայն իրենց կարծիքը, որը չի հակասում Վրաստանի բարոյա-էթիկական նորմերին, որտեղ միասեռականների ամուսնությունը և նրանց կողմից երեխաներ որդեգրելն անընդունելի է:
Նրանց կարծիքով` հեռուստաընկերությունն իրենց չպետք է ազատեր աշխատանքից, այլ պետք է սատարեր փոքրամասնությունների իրավունքները պաշտպանող կազմակերպությունների հարձակումներից: Այնուամենայնիվ, նրանք մտադիր չեն դատական հայց սկսել ընդդեմ «Իմեդի» հեռուստաընկերության:
