«Սիրիայում մնացած հայերը բոլորն էլ ցանկանում են դուրս գալ, բայց միայն այստեղ հասնելու հարց չէ, այստեղ էլ դժվարություններ կան»,- «Առաջին լրատվական»-ի հետ զրույցում ասաց «Սիրիահայերի համայնք» ՀԿ վարչության անդամ Ջորջ Բեդուրյանը: Ըստ նրա՝ սիրիահայերը գիտեն, թե Հայաստան եկածները ինչ կացության մեջ են հայտնվել. «Այսօր մենք էլ խնդիրների մեջ ենք, ապրուստը դժվար է այստեղ: Ինչպես որ այնտեղ սովոր էինք, այստեղ գործ չկա, լինելու դեպքում էլ մի շարք դժվարություններ են առաջանում, մարդիկ մտածում են՝ մնան այնտեղ, իրենց ունեցվածքին տեր կանգնեն»,- ասաց նա:
Ջորջ Բեդուրյանը նշեց, որ սիրիահայերի համար, չնայած թվարկած դժվարություններին, լավագույն կանգառը Հայաստանն է, քանի որ իրենց հայրենիքն է, շատ հարազատներ ունեն այստեղ, ուստի ճիշտ է, որ օր առաջ գան Հայաստան: «Հալեպում, Քեսաբում, նույնիսկ Դամասկոսում այսօր շատ վատ է, որոշում կա, որ մայիսի 12-ին դպրոցները ավարտելուց հետո գոնե երեխաներին բերեն այստեղ»,- մանրամասնեց Ջ. Բեդուրյանը:
Նա նշեց, որ հստակ թիվ չկա, բայց որ ամենաքիչը 2000 մարդ է լինելու, հաստատ է, հասնելու մինչև 5 000-ի, նույնիսկ ավել: «Այսօր միայն Հալեպում կա 30 000 հայ, իսկ Քեսաբում, Լաթաքիայում մի 10 հազար կլինեն: Հնարավոր է՝ 50 տոկոսը արդեն մայիսից հետո որոշի գալ, հնարավոր է՝ 60 տոկոսը, ամբողջովին չեմ կարծում, որ կգան»,- նշեց նա: Սիրիահայեր են պատրաստվում գալ նաև Լիբանանից. այնտեղ էլ իրավիճակը կայուն չէ:
Ջորջ Բեդուրյանն ասաց, որ այստեղ «Սիրիահայերի համայնք» ՀԿ-ն ամեն քայլ փորձում է անել, որպեսզի Սիրիայից եկողները կարողանան հարմարվել և իրենց առօրյա հոգսերը հոգան: Դիմել են նաև կառավարությանը, որպեսզի իրենց տարածք հատկացվի շուկա բացելու համար: «Թեկուզ ժամանակավոր շուկա լինի, ասենք՝ կանայք ձեռագործ աշխատանքներ են կատարում, վաճառեն, կամ անուշեղեն, տարբեր ուտեստներ վաճառեն»,- ասաց նա:
Մանրամասները՝ տեսանյութում:
