Քաղաքականությունից հեռանալուց հետո Գագիկ Ծառուկյանը կարծես թե սկսել է բացառապես բիզնեսով զբաղվել և ավարտին հասցնել Երևանի սրտում գտնվող մի շարք կիսակառույցներ, որոնք տարիներ շարունակ աղճատել են քաղաքի ճարտարապետական տեսքը:
Մասնավորապես, մի քանի օր է, ինչ թարմացվել են Խանջյան փողոցում, ավելի կոնկրետ` Օղակաձև այգում, «Joze» համալիրի հարևանությամբ գտնվող կիսակառույց սպորտհամալիրի շինարարական պաստառները: Շենքը պատվել է «Ավելի բարեկարգ Երևան» գրությամբ պաստառներով, իսկ ներսում շինարարական աշխատանքներ են կատարվում:
Հիշեցնենք, որ այս շինության կառուցումը սկսվել էր դեռևս տարիներ առաջ: Շինարարության մեկնարկից հետո այն որոշ ժամանակով կանգ առավ, քանի որ չկար համապատասխան շինթույլտվություն, սակայն հետագայում արտաքին տեսքից շենքը բերվեց ավարտուն տեսքի, իսկ ներսի աշխատանքներն այդպես էլ մնացել են անավարտ և հայտնի չէր, թե երբ կավարտվեին:
Ըստ որոշ խոսակցությունների, այս պահին էլ այդ շինարարության համար համապատասխան թույլտվություն չկա, այն անօրինական է, սակայն կառուցվում է միայն այն պատճառով, որ պատկանում է Ծառուկյանին:
Մի քանի օր է Երևանի քաղաքապետարանից փորձում ենք մանրամասներ պարզել իրականացվող շինարարության մասին, սակայն, քանի օր է` մեր հարցերն անպատասխան են մնում:
Նշենք, որ Ծառուկյանին պատկանող շինարարություններից այս համալիրը թերևս միակն է, որտեղ շինարարական աշխատանքները վերսկսել են: Մնացած կիսակառույցներն այդպես էլ շարունակում են մնալ կիսակառույց:
Հիշեցնենք, սակայն, որ քաղաքաշինության նախարար Նարեկ Սարգսյանը, երբ դեռ Երևանի գլխավոր ճարտարապետն էր, իր ասուլիսներից մեկի ժամանակ հայտարարեց, որ մայրաքաղաքում գտնվող և երկար ժամանակ անավարտ մնացած մոտ մեկ տասնյակ կիսակառույց խոշոր շինությունները աղճատում են քաղաքի տեսքը, և որ այդ շինությունների սեփականատերերին ծանուցվել է` մեկ ամսվա ընթացքում ներկայանալ քաղաքապետարան` այդ կիսակառույցներն ավարտին հասցնելու հետ կապված ծրագիր ներկայացնելու ու պայմանագիր կնքելու համար: Հակառակ պարագայում, գլխավոր ճարտարապետը նշել էր, որ այդ անավարտ շինություններն ու դրանց տարածքները կճանաչվեն հանրային գերակա շահ և հետ կվերցվեն սեփականատերերից: Նարեկ Սարգսյանի նշած այդ ժամկետից անցել է մոտ երկուսուկես տարի, սակայն բոլոր կիսակառույցները, որոնք պատկանում են տարբեր գործարարների ու մեծահարուստների, այդ թվում՝ Գ. Ծառուկյանի մեր նշած շինությունները, դեռ նույն անավարտ վիճակում են:
Քաղաքապետարանից չեն պատասխանել նաև մեր այն հարցմանը, թե ինչ փուլում է տարիներ շարունակ անավարտ մնացած շինությունների ճակատագիրը:
