Գազատարի շինարարության և իսրայելական գազ Թուրքիա մատակարարելու ոլորտում Իսրայելի և Թուրքիայի համագործակցությունը հնարավոր չէ: Պատճառը քաղաքական տարաձայնություններն են՝ ասել է Թուրքիայի էներգետիկայի և բնական պաշարների նախարար Թաներ Յըլդըզը: Այս մասին հայտնում է «Անադոլու» գործակալությունը՝ հղում անելով Trend-ին:
«Քանի դեռ Իսրայելը չի կատարել Թուրքիայի պայմանները, որոնք մենք դրել ենք «Ազատության նավատորմի» դեպքից հետո, էներգետիկայի ոլորտում Թուրքիայի և Իսրայելի միջև որևէ համագործակցության մասին խոսք լինել չի կարող»,- ասել է Յըլդըզը:
Նախարարը նշել է, որ այդ նախագիծը շատ ձեռնտու է ինչպես Իսրայելին, այնպես էլ Թուրքիային:
Այսօր մի շարք ԶԼՄ-ներում տեղեկություն է հայտնվել, որ Թուրքիան և Իսրայելը նախնական բանակցություններ են վարել «Լևիտան» հանքավայրից թուրքական շուկա գազ արտահանելու վերաբերյալ:
Իսրայելական նախագծի աղբյուրը հաստատել է բանակցությունների փաստը՝ ավելացնելով, սակայն, որ դրանք շատ բարդ են երկու երկրների հարաբերությունները խաթարած վերջին իրադարձությունների պատճառով:
Երկու երկրների հարաբերությունները կտրուկ սրվեցին 2010-ի մայիսի 31-ին՝ «Ազատության նավատորմի» վրա իսրայելական հատուկ ծառայությունների հարձակումից հետո:
Հարձակման ժամանակ զոհվել է Թուրքիայի 9 քաղաքացի: Անկարան հայտարարել է Թել Ավիվի հետ հարաբերությունները վերանայելու մասին և պահանջել պաշտոնապես ներողություն հայտնել: Իսրայելն ի պատասխան՝ հայտարարել է, որ ներողություն չի խնդրի:
