Ապրիլի 15-ին և 16-ին Լեհաստանի մայրաքաղաք Վարշավայում տեղի ունեցան Հայոց ցեղասպանության 100-րդ տարելիցին նվիրված ցուցահանդեսներ` Լեհաստանում բնակվող հայ նկարիչ Գագիկ Պարսամյանի «Ծաղիկների ջրվեժ» խորագրով ցուցահանդեսների շարքի երկրորդ անհատական ցուցադրությունը և Վարշավայի քաղաքապետարանում հայ նկարիչներ Ադել Հայրապետյանի «Հայոց հարսներ» և Գագիկ Պարսամյանի «Ծաղիկների ջրվեժ» խորագրով նկարների համատեղ ցուցահանդեսը: Վերջինս անցկացվում էր Լեհաստանում ՀՀ դեսպան Էդգար Ղազարյանի և Մազովեցկի շրջանի ղեկավար Յացեկ Կոզլովսկիի հովանու ներքո, ովքեր իրենց ելույթներով ողջունեցին ներկաներին:
Ցուցահանդեսներին ներկա են եղել դեսպան Ղազարյանը, ՀՀ-ում Լեհաստանի առաջին և երկրորդ դեսպաններ, պարոն Քնոտեն և պարոն Ռաչինսկին, Լեհահայոց մշակույթի և ժառանգության հիմնադրամի փոխնախագահ Արմեն Արտվիխը, հասարակական-քաղաքական գործիչներ, դիվանագետներ, Լեհաստանի էկոնոմիկայի նախարարության, լեհական ռադիոհեռուստատեսության, հայ համայնքի մշակութային հիմնադրամների և հասարակական կազմակերպությունների ներկայացուցիչներ, լեհ մտավորականներ և արվեստագետներ, լրագրողներ:
Ողջունելով բարձրաստիճան հյուրերի ներկայությունը ցուցահանդեսին և շնորհակալություն հայտնելով նկարիչներ Ադել Հայրապետյանին և Գագիկ Պարսամյանին գեղեցիկ նախաձեռնության համար՝ դեսպան Ղազարյանը նշել է, որ նման միջոցառումները լավ հնարավորությունն են ստեղծում ոչ միայն հայ և լեհ ժողովուրդների մշակույթներին միմյանց ծանոթացնելու համար, այլ բարեկամաբար հաղորդակցվելու և սատարելու միմյանց խնդիրերին:
Դեսպանը ներկաներին ներկայացրել է Հայոց ցեղասպանության դատապարտման և ճանաչման ուղղությամբ հայ ժողովրդի մոտեցումները` միաժամանակ իր և հայ ժողովրդի անունից խորին շնորհակալություն հայտնելով լեհ ժողովրդին և Լեհաստանի կառավարությանը, որը ևս, ի թիվս մի շարք երկրների, ճանաչել և դատապարտել է Հայոց ցեղասպանությունը: Դեսպանն իր երախտիքի խոսքն է հղել նաև Լեհաստանի իշխանություններին և ժողովրդին՝ Լեհաստանի հայ համայնքին ցուցաբերվող հոգատարության համար, ինչը նպաստում է հայկական մշակութային կյանքի հզորացմանը, ազգային-եկեղեցական ավանդույթների և համայնքային կյանքի ակտիվացմանը, ինչպես նաև ազգային ինքնության պահպանմանը:
Ցուցահանդեսի ընթացքում Լեհաստանում բնակվող երիտասարդ օպերային երգչուհի Սոնա Մաթևոսյանի կատարմամբ հնչել են Կոմիտասի ստեղծագործությունները:
