Իրանը և Ատոմային էներգիայի հարցերով միջազգային գործակալությունը մնացած վիճելի հարցերի համար լուծումներ են գտել: Այս մասին չորեքշաբթի օրը հայտարարել է ԱԷՄԳ-ում Իրանի պաշտոնական ներկայացուցիչ Ռեզա Նաջաֆին:
«Այսօրվա հանդիպման արդյունքում Իրանը գործակալությանը մնացած երկու վիճելի հարցերի շուրջ տվյալներ ներկայացրեց: Իրանը հուսով է, որ դրանք հաջորդ փուլից հետո կփակվեն»,- ընդգծել է Նաջաֆին IRNA գործակալությանը, Թեհրանում կայացած ԱԷՄԳ-ի հետ բանակցություններից անմիջապես հետո:
ԱԷՄԳ-ի պատվիրակությունը՝ գլխավոր տնօրենի տեղակալ Թերո Տապիո Վարոանտի գլխավորությամբ մեկօրյա բանակցություններ է վարել Իրանի Ատոմային էներգիայի հարցերով կազմակերպության ներկայացուցիչների հետ: Դրանց ընթացքում երկու հարց է քննարկվել, որոնք վերաբերում են նեյտրոնային զեկույցներին և հոդվածներին, որոնք հրապարակվել են Իրանի կողմից, ինչպես նաև իբրև թե Իրանի կողմից Մարիվան քաղաքի մերձակայքում պայթյունային փորձարկումների իրականացումը: Իրանը գործակալության փորձագետներին առաջարկել է ստուգել այդ օբյեկտը, սակայն ԱԷՄԳ-ի ներկայացուցիչները դա չեն արել:
Ընթացիկ փուլն իրականացվում է համատեղ պլանի շրջանակներում, որը 2013-ին ստորագրվել է Իրանի և ԱԷՄԳ-ի միջև:
