Փետրվարի 12-ի երեկոյան չարտերային չվերթով «Իմպուլսի» 30 հոգանոց պատվիրակությունը ակումբի նախագահ Տիգրան Հակոբյանի գլխավորությամբ մեկնեց Կիպրոս, ուր կընթանա թիմի ուսումնամարզական երկրորդ հավաքը: «Իմպուլսը» հանգրվանել է Այա Նապա քաղաքի «Ակտեա» հյուրանոցում:
Կիպրոս չի մեկնել միայն թիմի ավագ Նարեկ Դավթյանը, ով ներկայումս Գերմանիայում բուժման կուրս է անցնում: Ըստ նախնական պայմանավորվածության «Իմպուլսը» Կիպրոսում իր առաջին ստուգողական հանդիպումը պետք է անցկացներ փետրվարի 13-ին, սակայն տեղում «Իմպուլսի» ծրագրերը որոշակի փոփոխությունների են ենթարկվել: Փետրվարի 15-ին Երեւանի ժամանակով 17:30-ին «Իմպուլսը» կմրցի բուլղարական հանրահայտ «Լեւսկիի» հետ, որը Բուլղարիայի ընթացիկ առաջնությունում 15-րդ տուրից հետո վաստակած 37 միավորով ընթանում է 2-րդ հորիզոնականում եւ ընդամենը 1 միավորով է զիջում առաջատարին՝ «Լուդեգորեցին»:
Կիպրոսում «Իմպուլսը» եւս 3 ընկերական հանդիպում կանցկացնի, որոնց մասին կտեղեկացնենք լրացուցիչ: Հիշեցնենք, որ «Իմպուլսը» Կիպրոսից կվերադառնա փետրվարի 27-ին:
